Nongpoh, Nailar 13 : Kum shibynta ban pynphuh pynphieng ia ka jingrakhe jingdap 75 snem ka jingïoh laitluid ka Ri India bad 50 snem ka jingioh jylla Meghalaya, mynta ka sngi ka tnad pulit na Umsning Police Outpost ha ryngkat ka Umsning Town Dorbar ki la pynlong ïa ka prokram ba kyrpang ha Umsning.
Ha kane ka prokram, la sakhi ruh ïa ka jingïashimbynta da ki pulit ka 6 Battalion Umran kiba la ïaid paidbah da ki thuk thuk ban pynsngewthuh paidbah ïa ka jingkordor ban ieid bad burom ïa la ka ri lyngba ka jingsam ruh ïa ki lama lai rong ka ri India ha kylleng ki shnong ka thaiñ Umsning.
La ïa donlang ha kane ka sngi, da u Bah Lakador Syiem, Commandant ka 6 Battalion, u Bah W. Suting, In-charge ka Umsning Police Outpost nalor kiwei kiwei ki ophisar bad nongïalam ka Umsning Town Dorbar.
Kumba la ïoh jingkren lyngba ki pulit ophisar ki la ai jingshai paidbah ruh halor ka Har Ghar Tiranga bad ka Cyber Jaagrookta Divas bad la sam ruh palat 300 tylli ki lama lai rong ka ri India sha ki longïing longsem ka thaiñ Umsning.
