Shillong Naitung 30: U Lat bathymmai ka jylla Meghalaya u Chandrashekhar H Vijayashankar, ula ong, ba u buh eh hakhmat ban kyntiew iaka roi ka par jong ka jylla bad ym don satia ia kano kano ka jingthmu kaba shimet hynrei ban shim ia baroh ha ka jingshaniah ban kiew ka Jylla.
Haba ïakren bad ki nongthoh khubor hadien ba ula shimti ïa ka shuki, u Vijayashankar ula ong, “Ka dei shisha ka kabu ba un ioh shakri ïa ka jylla Meghalaya kum u Lat jong ka jylla. Nga sngewnguh shisha ia ka President ka ri Draupadi Murmu bad ia u Myntri Rangbahduh ka ri u Narendra Modi. Nga la shakri kum u MLA, MP bad kum u Myntri Sorkar hynrei kane ka kam kum u Lat ka dei shisha ka jingkitkhlieh kaba khraw ha ki tyrpeng.”
Ula ai ka jingïaroh ruh ïa ki paidbah ka jylla Meghalaya kiba la pynlong ïa ka jingkhuid jingsuba kum ka mat ba hakhmat eh jong ki bad kumjuh ruh ban pynthikna ba ka jylla ka long kaba shongsuk shongsaiñ khlem kano kano ka jingeh ha ka suk ka saiñ.
U Lat ba thymmai ula ong, ba um don kano kano ka jingthmu shimet lait noh tang ban trei na ka bynta ka roi ka par jong ka jylla Meghalaya.
“Nga dei ban trei hangne kum u Lat. Nga shim ia baroh ha ka jingshaniah, ym tang ia ka sorkar, ki bor synshar, nga shim ia baroh ha ka jingshaniah bad tang kawei ka mat ka long, ka roi ka par” ong u Lat.
“Ngam don kano kano ka jingthmu shimet hangne, ngan ym buh satia ia kano kano ka jingthmu shimet hangne kynthup ia ka kam politik. Ngam don kano kano ka jingthmu ha ka sain pyrthei,” ula ong bad ka bynrap “Ka President bad u Myntri Rangbahduh ka ri kila phah ia nga hangne ban shakri ia ka jylla kum u Lat, kata ka dei ka kamram jong nga. Kum u Lat, kano kano kaba nga dei ban peit, kano kano ka jingshimkhia kaba nga dei ban shim, ngan bat skhem ia kata. Kiwei pat ki mat kim iadei satia bad nga.”
U Vijayashankar ula pynpaw ruh ba u kwah ba ki paidbah ka jylla Meghalaya kin kynmaw ïa u kum uwei na ki Lat uba trei hok bad uba thrang ban kyntiew ïa ka roi ka par ha ka jylla.
“Ki paidbah Meghalaya ki dei ban kynmaw beit kumne. Ha kata ka rukom nga kloi ban aiti ïa ka por jong nga, nga kloi ban trei na ka bynta ki paidbah,” u la pynpaw.
Ula pynpaw ia ka jingkmen ba ka NDA ka pyniaid ia ka sorkar ha Meghalaya, u Vijayashankar ula ong, “…kawei pat kaba nga kwah ban iathuh ia phi ka long ba nga da sngew sarong haduh katta katta ban ong hangne, ha ka por ba nga rung ha Parliament kum u dkhot, u (Late Purno A) Sangma ula long u Speaker ha kata ka por bad mynta hi u khun jong u, u (Conrad K ) Sangma u dei u myntri rangbah. Ha ka por ba nga rung Parliament ha ka sien kaba nyngkong, u kpa jongu u long u Speaker bad haba nga wan hangne kum u Lat, u khun jongu u dei u myntri rangbah. Nga tip bha ia kane ka longiing, nga tip ia ka tynrai jong ka longiing. Nalor kata, ka sorkar NDA ka pynïaid hangne bad nga shim ïa baroh ha ka jingshaniah, namar ha kaba kut, ngi hap ban pynïaid ryntih ïa ka sorkar bad man ka por ngi hap ban ai ïaka jingbuh hakhmat eh bad ka jingkordor kaba khraw tam ïa ka sorkar jong ka jylla khamtam nga trei hangne kum u Lat.”
“Ngan leit ban don ryngkat bad ki paidbah bad shim ia phi ki briew ha ka jingshaniah. Kumta to ngin ïatreilang na ka bynta ka roi ka par jong ka jylla Meghalaya,” la kyrpad u Lat.
Haba kylli la u Lat ka jylla un shimkhia bad ka Sorkar Pdeng ban pyntreikam mardor ia ka ILP ban weng ia ka jingeh jong ka jingwan rung kyrthep ki briew kiba nabar, u Lat ula ong, “Na ka bynta ka jingtip jong phi, nga iathuh ia phi ba nga ruh nga dei na kata ka jaidbynriew bad nga wan na kajuh ka jaidbynriew, ka jaidbynriew kaba phi la kren mynta, kajuh ka jaidbynriew kaba nga dei, ym don ei ei ban khuslai, nga tip ia ki jingeh jong kane thain. La slem bha ba nga la wan sha Meghalaya ha ka por ba nga dei u dkhot jong ka Parliamentary Standing Committee halor ki lynti rel bad nga lah wan Arsien nga la wan jngoh ia ka jylla Meghalaya. Bunsien nga la wan hangne hynrei ngam pat ju kren sha ki lad pathai khubor. Kane ka dei ka sien kaba nyngkong ba ngan ai jingkren hangne. Nga tip ia ki mat jong ka thain bad kita ki mat baroh ngin buh ha ka jingmut bad to ngin pyrshang ban leh bad ai ia ka hok ia ki.”
