Dawa ki kali Tourist na Assam-Megh ban khang noh ki Sorkar
Nongpoh, Naitung 30 : Ki seng jong ki kali Tourist ka Assam-Meghalaya, kila pynpaw ia ka jingsngewkhia kaba jur halor ka jingmih ki kali shimet ban kamai da kaba kit ia ki nongshangkai pyrthei sha kylleng ki jaka jngohkai ha Meghalaya bad Assam ruh kumjuh.
Kane ka sur kala mih na ka jingialang ki seng jong ki Nongniah kali Tourist ka Assam-Meghalaya ba kynthup ia ka Hynniewtrep Tourist Taxi Association bad a Greater Guwahati Tourist Taxi Association, kaba long hynne ka sngi Ba-ar ha Green Hills, Nongpoh.
Kine ki seng kila shim ia ka rai ban ujor sha la ki jong ki Sorkar Jylla (Assam bad Meghalaya) halor ka jingiaid kamai laitlan jong ki kali shimet na ki nongshangkai pyrthei, kaba la pynduhnong shikatdei eh ia ka kamai jakpoh jong ki.
Kane ka jingialang ka dei kaba la pynlong halor ka jingkhang lynti jong ka seng Hynniewtrep National Youth Front (HNYF) ia ki kali Tourist ka Assam ban kit ia ki nongshangkai pyrthei sha Sohra bad Dawki, kaba jia kaba 26 tarik Naitung, 2024 ha Umtyngngar
Kane ka jingjia ha Umtyngngar kala wanrah ia ka jingsngew iapher jingmut kaba jur bha na ki nongniah kali tourist ka Assam, kaba la pynbor ia ki nongniah kali tourist na Meghalaya ban lum ia ka jingialang ha kaban iakren pynbeit ia kane ka kam.
Hadien ka jingiathir iatar kaba neh katto katne kynta, kine ki seng jong ki kali Tourist kila mynjur ban bteng ia ka jingiatrei lang kumba ju long baroh shikatta bad ban pynthikna ba kum ka jingjia ha Umtyngngar kan yn jia shuh bad kan ym ktah ruh ia ka kamai kajih jong ki kali Tourist na baroh ar Jylla ha kine ki sngi ban wan.
Ki seng na Meghalaya kila pynshai ba katei ka jingjia ha Umtyngngar ka dei kaba leh da ka Kynhun Sengbhalang bad ka Sorkar kala shimkhia ban leh eiei halor kane ka kam.
 halor ka jingiaid kamai laitlan jong ki kali shimet na ki nongshangkai pyrthei, kaba la pynduhnong shikatdei eh ia ka kamai jakpoh jong ki.){kind=link}