Nongpoh, Naitung 30 : Ki Nongialam ka Hynniewtrep Youth Council (HYC)-Ri-Bhoi, kila shah pynngat case bad shah khot hajir ha ki Pulit ka Khanapara Police Station, namar ka jingleit khynra Trading Licence ia kawei ka karkhana sain jri kaba don ha Mawsmai.
Kine ki Nongialam ka HYC ki kynthup ia u President Bah Hercules Suting, u General Secretary Tony Shylla lem bad u Bah Shan Marwein.
Kine ki Nongialam ka HYC kila hap leit mih hynne ka step Ba-ar hakhmat ki Pulit ka Khanapara bad la synran ia ki da ki dkhot ka seng lem bad ki nongialam ka SengKmie ba kynthup ia u Vice President Gee Mawlong bad kiwei kiwei.
Kane kala wan jia hadien ka jingujor ejahar jong u trai ka karkhana sainjri ba kyrteng ka Resources Rubber Pvt Ltd, ba pyrshah ia ka jingwan khynra Trading Licence bad khang tala be-ain ia ka karkhana.
Haba kren sha ki lad pathai khubor, u Bah Hercules ula pyntip ba ki Pulit kila pynngat haduh 6 tylli ki kyndon ain pyrshah ia ki nongialam ka seng ba leit khynra ia kane ka karkhana sain jri.
“Ngim sngew eiei ia ka jingkhot hajir ki Pulit namar kum ka seng, ngi sngew ba ngim shym la leh bakla. Ngi la leit khynra Trading Licence ban tip la utei u bar jylla ba pyniaid ia ka karkhana sain jri, u dei uba la pynbiang ne em ia ki kot ki sla” ula ong.
U pyntip ba hadien ba ka Seng ka lap ba une u bar jylla um don satia ia ki kot ki sla kiba biang, ka Seng kala dawa ia ka KHADC ba kan leh da kaba tyngeh ia une u briew lem bad ia katei ka karkhana.
“Ka Seng hi kan ym shongthait ban khynra Trading Licence ha ka thain” ula ong.
