Shillong, Naitung 26: Ka Seng Hynniewtrep National Youth Federation ne HNYF ka East Khasi Hills District, ha ka sngi Thohdieng, kala bat bad pynphai lut ploin ia ki kali Tourist ba wan na Assam ha ka thain Umtyrngar, kiba thmu ban leitkai sha ki jaka jngohkai ka thain Dawki bad Sohra.
Ia kine ki kali la bat ha ka lad ban leit sha Sohra bad sha Dawki, kiba dei ki jaka shangkai pyrthei kiba khring tam ha kum kane ka por hapoh ka Jylla.
Ka HNYF kala shim ia kane ka sienjam halor ka jingkynnoh ba ka Sorkar kam shym la leh eiei ban pyrrkhing ia ka jingwan rung kyrthep ki bar jylla nalor ka jingioh iaid laitlan jong ki kali na Assam ban kit nongshangkai pyrthei sha ki jaka jngohkai kiba don ha Sohra bad ha Dawki.
Ka HNYF kala leh iakane halor ki jingkynnoh ba ki kali Tourist jong ki trai jaka, kila duhnong bha namar kim iohlad shuh ban kit iaki nongshangkai pyrthei kiba wankai sha Jylla. Kane ka Seng kala pynbna ba kan nym ailad shuh ia ki kali ba don u nonbor AS ba kin kit ia ki nongshangkai pyrthei sha ki jaka jngohkai ka Jylla.
Baroh ki kali Tourist kiba don ia u nombor AS kila shah pynphai lut, kaba la pynbor ia ki bor District bad ki Pulit ba kin hiar mardor sha Untyrngar ban peitthuh ia ka jinglong jingman bad ban tehlakam ia ka suk ka sain.
Wat hapdeng ka jingdon ki bor ka Ain, ki dkhot ka HNYF kala ieng skhem triang ban nym ailad ia ki kali na Assam ban leit sha ki jaka jngohkai.
Ka khubor ba dang shu ioh ka iathuh ba ki Pulit kila kem noh ia ki nongialam bad ki dkhot ka HNYF kiba don bynta ha kane ka kam.
Ka HNYF kala ban jur ba, kala shim ia kane ka sienjam, namar ka jingleh bym suidniew ka Sorkar Jylla khamtam ka tnat Tourism ban pyntreikam daka Policy ban pyrkhing iaki kali bar Jylla ban rung wat shaki kyndong kynshrot jong ka Jylla.
Lah ban kdew baka All Khasi Meghalaya Tourist Taxi Association (AKMTA) dang shen kala dawa na u Myntri ka tnat kam jngohkai pyrthei (Tourism) u Bah Paul Lyngdoh ban khang iaki kali bar Jylla ban kit iaki nongshangkai pyrthei shaki jaka jngohkai ka Jylla.
