Nongpoh, Naitung 24 :Tang hadien arsngi ba khang tala ka HYC-Ri-Bhoi ia ka karkhana sainjri Resource Rubber Pvt Ldt ha Mawsmai, ki Pulit ka Ri-Bhoi kila leit ban kem ia u briew ba kam trai ia ka jaka jong kane ka karkhana namar ka jingujor ejahar pyrshah da u Trai ka karkhana Joginder Pal Kapoor.
Une u briew u kyrteng u Bah Donald Rymbai, ula shah kem hynnin ka shiteng miet nala iing.
Lah ban kdew, ha ka 22 tarik Naitung, ki Nongialam bad Dkhot ka HYC-Ri-Bhoi ha ka jingiadonlang u Bah Donald Rymbai, kila hiar khynra ia ki kot ki sla jong kane ka karkhana hynrei u Joginder Pal Kapoor ula pyneh bad khlem sei satia ia ki kot ki sla, kaba la pynbitar ia ka HYC haduh u pud ban shim ia ka sienjam da kaba khang tala syndon ia kane ka karkhana.
Ka HYC kala shim ruh ia kane ka sienjam halor ka jingkam jong u Bah Donald ba kane ka karkhana ka khlem siew satia ia ka bai wai jaka kaba la iakut manla u snem.
Ia u Bah Donald la rah sha Nongpoh Police Station na ka bynta ban pynlong ia ka jingtohkit.
