Nongstoiñ, Naitung 24: Ka Seng Samla Dong Mawpun bad ki dkhot VDP New Nongstoiñ, ha ka miet 23 tarik Naitung kala pynlong ia ka jingkhynra ha Mawpun halor ki jingujor ba don ki nongpynkhalai bad die kyiad hapoh ka dong.
Ha ka jingkhynra ba la ïalam da u Night Leader ka VDP samla Willson Myrthong, ki VDP kila lap ïa ki briew kiba khalai bad dih kyiad hapoh ka dong Mawpun kaba hap ha ka shnong New Nongstoiñ bad ki la leh ïa la ka kamram bad ai jingsneng.
La ïathuh ba ha ka jingïoh kem la lap ba nalor ka kam ïa khalai, la lap ruh ïa ka kyiad kumba shi case bad ka VDP ka la theh noh ïa baroh sha madan ryngkat ka jingmaham ba lada dang lap, ka VDP kan leh da kaba tyngeh.
U Night Leader u la kyntu ïa ki Rangbah dong ki Secretary jong ki dong, ban hap peit lem bad ai mynsiem lem ïa ki khun samla shnong, ba kin nang ïai rhem haba trei ïa ki kam shnong, khamtam kine ki kam ba pynthoh bria ïa ka shnong bad ka jaidbynriew.
