Guwahati, Naitung 23 : U Myntri Rangbah ka Assam Himanta Biswa Sarma, ula ai khublei ia ka Myntri pla tyngka ka Ri Sitharaman halor ka jingtyrwa ia ka mang tyngka ba kyrpang sha ka Jylla ba kan leh eiei halor ka jingshlei um ba man u snem ha Jylla.
“Ngi da sngewnguh shisha ia ka song kyrpang ba ka Assam ka ioh naka mang tyngka ka ban iarap ia ngi ban lah leh eie halor ki jingeh ba wan na ka jingshlei um” ong u Sarma.
Ka Sitharaman ula wanrah ia ka mang tyngka hynne ka sngi ha Lok Sabha, kaba tyrwa ia ka song jingiarap sha ki Jylla ba ju mad ia ka jingshlei um kum ka Bihar, Assam, Himachal Pradesh, Uttarakhand bad Sikkim, ba kin lah leh eiei kynthup ka jingpyntreikam ia ki project ki ban pynduna ia ka jingshlei um.
“Ka mang tyngka 2024 ka Sorkar Pdeng kala buh ia ka song ba T.1.5 lak klur sha ki Jylla ba kin pynjanai ia ka jingpynmih marrep, pynroi ia ki jaka nongkyndong, ban kyntiew ia ki jingshakri na ki kam ki bym ktah ia ka mariang bad kiwei kiwei” ong u Sarma haba bynrap ba kane kan sa wanrah ia shibun ki jingkylla ha ka roi ka par jong ka Assam.
Ula ong ruh ba ka jingpynheh ia ka bhah hapoh ka PM Awas Yojana bad ki skhim kum ka PM Janjatiya Unnat Gram Abhiyan kin iarap bha ia ki nongshongshnong ha Assam.
Haba iaroh ia ka mang tyngka bala wanrah da ka Sorkar Pdeng, u Himanta ula ong ba kane ka mang tyngka kan kyntiew ia ka ioh ka kot jong ka Ri sha ka thong ban long ka Ri ba wan ba lai ha ka jingheh duh ka ioh ka kot kumba la angnud da u Myntri Rangbah Duh ka Ri Narendra Modi.
