Nongstoiñ, Nailar 13: Ka jingbuhteng ban їa pynbeit їa u pud u sam hapdeng ka Meghalaya bad Assam, ka la buh їa ki paidbah kiba shong ha ki shnong khappud ha ka jingeh na ka daw jong ka jingwan tuklar jong ki pulit Assam.
Ka jingtuklar jong ki pulit Assam ka long haba ki pyntrei їa ki kam pynroi ym tang kiba la bei pisa da ka sorkar jylla, hynrei wat їa ki kam pynroi kiba la bei pisa da ka sorkar pdeng, kum їa ka jingpyntrei їa ka skhim Mahatma Gandhi Rural Employment Guarantee Scheme bad kiwei kiwei.
Kumban shu pynkynmaw ba ha ka taїew ba ar jong u bnai Kyllalyngkot 2021, ki pulit Assam kiba na Langpih BOP hadien ba ki Nepali kiba shong ha Lawbah ki la pyntip ba ka don ka jingpyntrei їa ka surok ha ka shnong Umwali kaba dei na ka skhim MNREGS, ki Pulit ki la wan bad ki la pynsangeh mar dor.
U nongthoh khubor haba їoh ban їakynduh їa ki nongshong shnong, ki la їathuh ba naduh katei ka sngi ba ki pulit Assam ki la wan ban pynsangeh kim shym la trei shuh haduh mynta.
Saw snem mynshuwa, ki pulit Assam kiba don ha Langpih ki la pynsangeh їa ki nongtrei jong ka MePDCL katba ki dang trei їa ka laiñ ban pynpoi bording sha ka shnong Mawdiangsnam bad katei ka jingtrei ka la sah kut haduh mynta. Nangta ha ka taїew ba la dep ki la pynsangeh sa їa katei ka jingpyntrei їa ka skhim MNREGS ha Umwali.
Ki paidbah na Umwali, ki la kynnoh ruh ba katkum ka jingtip jong ki, ka jingtuklar bad jingpynsangeh jong ki pulit Assam na Langpih ban pyntrei їa katei ka surok, kam dei satia kaba la bthah da ki bor ba halor hynrei ka dei tang ka jingleh jong u Incharge na Langpih.
Kitei ki nongshong shnong ki la dawa ruh ba ka sorkar ka la dei ban pynbeit noh kloi їa u pud u sam, khnang ba ki paidbah kin ym shah pyndik ha ki pulit Assam man la ka por.
