Nongpoh, Nailar 12: Ka Seng Hynniewtrep Integrated Territorial Organization (HITO)- Raid Myrdon Area, hynne ka sngi kala ujor pyrshah ia uwei u Contractor halor ka jingkynnoh ba u trei tang dep rukom ia ka skhim Jal Jeevan Mission (JJM) ne ka skhim pynioh um ha man ki thliew Iing, ha ki lai tylli ki Shnong ka Them Ri-Bhoi.
Kane ka Seng kala buh ia kane ka jingujor hakhmat u Executive Engineer ka Tnad Public Health Engineering (PHE) ka Umsning Division haba kdew ba kine ki skhim JJM ki kynthup ia kawei ha ka shnong Nong Mawlong, ha Mawlong Thymmai bad kawei ha Mawlong Rim.
Kane ka Seng bala ialam da u President Bah Seibor Maring bad General Secretary Bah Moon Mariang, kala leit buh ia kane ka jingujor hadien ka jignleit jurip ia ka rukom pyntreikam ia kine ki skhim ha kine ki lai tyli ki Shnong.
Kane ka jingjurip kala jia ruh na ka jingujor jong ki paidbah kiba la pynpaw ia ka jingbym hun ia ka rukom pyntreikam ia ka skhim, kaba khlem pat ai jingmyntoi ne khlem pat pynpoi um thikna wat hadien bala dep ban pyntrei ia ka.
Ka HITO Raid Myrdon kala pynpaw ia ka jingsngewkhia ruh ban lap ba u Contractor la kynnoh ba ula pyndonkam da ki pipe um kiba rim ban tan um. Nalor kane la kynnoh ruh ba une u Contractor u la shna tang 6 tylli ki top um naka 7 tylli kaba dei ban shna.
Ka HITO ka dawa ia u Executive Engineer ba un phah tohkit mardor ia ka jingpyntreikam ia ka skhim JJM ha kine ki shnong ban pynthikna ioh ka don ka jingpyndonkam bakla ia ka pisa da u Contractor.
