Shillong, Naitung 11 : Ka Federation of Khasi Jaintia & Garo People (FKJGP) kala buh jingkylli ia u Myntri Rangbah ka Jylla Conrad K Sangma da kaba ong “Hato um tip mo ba ka ain Inter-State Migrant Workmen (Regulation of Employment and Conditions of Service) Act, 1979 (Work Permit) kala treikam ha Jylla naduh ka 28 tarik Naitung, 2011.
Ka FKJGP kala buh ia kane ka jingkylli halor ka jingkren u Myntri Rangbah ka Jylla ba ong “Ym donkam Work Permit ha Meghalaya” na ka bynta ki bar jylla kiba wan bylla ha Jylla hynrei ki dei tang ban shu pynrung kyrteng ha ka Tnad Labour.
“Ka FKJGP ka pynrem jur ia ka jingkren laplah bad kren khyllung khynnah u CM. Hato um tip mo ba ia ka Inter-State Migrant Workmen (Regulation of Employment and Conditions of Service) Act, 1979 (Work Permit) kadei ka aiñ kaba la dep ban pynjur bad pyntreikam naduh ka 28th July 2011” ong u Bah Dundee C Khongsit, President ka FKJGP ha ka kyrwoh.
U Bah Dundee ula ong ruh ba ka FKJGP ka sngew ba lada kat u Khlieh Nongsynshar ka Jylla um tip bha ia ki ain kiba la don lupa, kumno ka Jaidbynriew bad ka Jylla kan lah ban shaniah ha kum kine ki nongialam haba kynnoh ba kane ka (jingkren) dei ka jingpyrshang ban ialam bakla ia u paidbah namar ka jingkwah ailad bad iada ia ki mynder ba wan rung kyrthei tang ban myntoi ha ka sain pyrthei bad pynlong vote bank ban skhem ka shuki.
U Bah Dundee ula ong ruh kumno ka Jylla kan shaniah ia kum kine ki nongialam ba kin shakri ia ka Jaidbynrew lada ia ki ain kiba la don lypa ki dang pyrshang pynjah klep, sa katno tam lei ban pynurlong bad ban buddien sha Delhi ia ki Resolution ka Iingdorbar Thaw Ain ba kynthup ia ka jingpyntreikam ia ka Inner Line Permit (ILP) bad ka jingpynrung ia ka ktien Khasi ha ka khyrnit ba phra jong ka Riti Synshar ka Ri.
Halor ka jingkynthoh ba ki Sengbhalang kim don hok ban talasi kot ia ki nongbylla bar Jylla, ka FKJGP ka buh jingkylli “Hato kita ki Infiltration Check Gate kin shu long tang ki khyrdop lum khajna jongno re jongno bad kita ki Labour Inspector ba la thung ha man la ki Block kin shu pyn syrwa kai iaka pisa jong ka sorkar da kaba shu shim tulop ei khlem da treikam satia”.
“Ka Sorkar jylla kadei ban tip bad sngewthuh shai ba kata ka jing register Case 4 tylli pyrshah ia ki Dkhot Seng Bhalang kan ym pyntieng pynsmiej satia hynrei ki Dkhot jong ka FKJGP kin iai long ki nong piet pyrman ban khanglad iaki mynder ban rung laitluid sha kane ka jylla jong ngi bad ki kynroh jong ki along kin nym pynduh mynsiem satia hynrei ki long ki jing ai mynsiem ia ki dkhot jong ki Sengbhalang” ula bynrap.
U Bah Dundee ula bthah ia baroh ki shnat treikam ka FKJGP kiba don ha ka Jylla ba kin bteng beit ia ka jingkhynra mynder khnang ban long ka jingiada ia ka Jaidbynriew na ka jingshah tyllep bad ban wanrah jingshngain ruh ia ki pateng ki ban sa wan.
