Shillong, Naitung 11 : Ka Tnad Pulit kala kem ia uwei u briew ia uba la suba jur ba u don bynta ha ka jingpyniap tohmet ia 4 ngut ki briew ha shnong Umpleng, kaba hap hapoh Eastern West Jaintia Hills.
“Haba iadei bad ka jinglap ia ki metiap jong ki 4 ngut ki briew ha Umpleng ha ka 6 tarik Naitung, bala suba jur ba ki shah pyniap, la register ia ka case hapoh ka kyndon 103/3(5) BNS bad ha ka jingiaid ka jingtohkit, uwei u briew ula shah kem” ong u Giri Prasad, Superintendent of Police ka East Jaintia Hills ha ka sngi Palei.
Hynrei ula ong pat ba um pat lah ban ai ia ki jingtip ba bniah shaphang une u briew namar ba dang iaid ka jingtohkit.
“Ka jingtohkit ka dang iaid shakhmat ban lapdien bad ban kem ia kiwei pat ki briew kiba donkti ha kane ka kam bymman” ong u SP.
Ha ka 6 tarik Naitung, saw ngut ki briew kila shah pyniap ha ka rukom ba ingiew bha hapoh ka shnong Umpleng. Kine ki briew kila shah the bad kti bad kjat bad shah mait da ka mait na ki bynta jong ka khlieh.
Kine kiba iap bala pynithuh da ki bahaiing hasem ki kynthup ia u Ravi Rai (23) ba na Patha Elam, Nepal bad u Nasar Kyndait (33) ba na Dkhiah East Pohshnong, East Jaintia Hills.
Ki Pulit kila register case ia kane ka jingjia ha Khliehriat Police Station.
