Shillong Naitung 09: Ka Myntri ka koit ka khiah ka jylla Dr Ampareen Lyngdoh hynne ka sngi Baar kala pyntip ba ka National Medical Commission (NMC) shen kan sa wan jngoh ia ka jylla hadien ba ka sorkar jylla kala pynpaw iaka jingkloi ban pyntreikam iaka Medical College ka ban pyniaid da ka sorkar bad ka Medical College kaba pyniaid da ki riewshimet.
Haba iakren bad ki nongthoh khubor, ka Kong Ampareen Lyngdoh kala ong, “Ngi la iaid bha shakhmat bad ha ka jingshisha ka Medical Authority of India kala ioh iaka jingpyntip ba ka jylla Meghalaya mynta kala long kaba la pynkhreh la kumno kumno ban pyntreikam noh ia kawei ka Government Medical College bad kawei ka Private Medical College”.
“Ia mynta ngi lah don ia jingiakren kaba man la ka por bad ka bor kaba dei khmih bad ngi pyniaid shakhmat ia ki jingiatai bad jingiakren bad ka Medical Association jongka Meghalaya bad ia ki ruh ngi lah kynthuplang bad ngi lah iakren ruh bad ka NEIGRIHMS namar kin btin lynti lem ia ngi ha ki Committee baroh kiba iadei bad ka jingthmu ban sdang ia ki Medical College. Kila don 2-3 tylli ki committee kiba la dep ban thung bad ngi dang iaid shakhmat” kala ong.
Kala pyntip ba ka Shillong Medical College kan dei kaba longtrai bad pyniaid da ka sorkar bad kin pyndonkam ia ka jingshakri na kylleng ki Hospital kiba don, kiba la longtrai bad pyniaid hi da ka sorkar jylla.
“Ia mynta ngi donkam ban pynthikna ba ngin lah ban shim wai ia ki Professors, Lecturers ha ki tnad bapher bapher kiba kongsan. Ngi lah bad ngi lah ruh ban ym don ia kitei ki riewstad ne riewshemphang ha ka jylla, kumta ngi hap ban pynthikna haba ngi sdang ia kitei ki jaka pule ym dei ban don kano kano ka jingduna ne ban iapeiñ ha kaba iadei bad ka jinglong jingman jong ka kyrdan ai jingnang jingstad” la ong ka Myntri.
Kala pyntip ba ka NMC shen kan wan jngoh iaka jylla Meghalaya bad kila don lypa katto katne ki briew kiba la wan bad ka jylla kala don ia ki riewstad bad ki riewshemphang bapher bapher kiba lah ban iarap bad ban btin lynti halor katei ka bynta.
Kala pyntip ba ka sorkar ka buh ia ka thong ban sdang iaka Shillong Medical College hapoh u snem 2025-26.
“Kadei ka jingbuh por, ka long kaba eh hynrei ngin kyrmen skhem ba ngin lah ban pynurlong ia ka” ong ka Kong Ampareen.
Kala ong, ba ka sorkar ka dang wad ia baroh ki lad ki lynti. “Ki don sa katto katne ki sienjam kaba ngi hap ban shim, ngin pynthikna ba dei ban pyndep ia katei bad ngi la iatrei ryngkat bad iajan bha bad ki shipai namar ba ki lah ban don ia ki jingtip kiba bniah, ki tiat ki tar bad ki jingdonkam kiba kongsan ha kylleng ki bynta jong ka thaiñ shatei lammihngi bad ngi la pan jingiarap na ki” ong ka Kong Amparen.
Kala iathuh ruh ba u Vice Chancellor jongka North Eastern Hill University (NEHU) ula iawer ia u Secretary uba khmih ia ka koit ka khiah ban don byntalang ha kaban shimkhia lem ia ki jingdonkam, ka jingpyniaid shakhmat ia ki kam ki jam bad ban pyniaid shakhmat ban ioh iaka Affiliation.
“Ngi dang khmih lynti ban ioh ban shim noh ia ka rai kaba khatduh bad baroh kan sa leit lut sha ka kynhun myntri ha hswa ban shim ia ka rai kaba khatduh. Kala don ka lad iaka jylla Meghalaya ban pyniasoh ia ki Medical College bad ka NEHU ne ka State University. Ia mynta hi, ngi dang pan ia ki jingpynsngew, khnang ba kano kano ka rai kaba shim da ka sorkar jylla kan long na ka bynta ka jingmyntoi jong ka projek bad ban peit ba bakitei ki Medical College kin ioh ban iaid beit” kala ong.
