Shillong, Naitung 08: U Myntri ka tnad Bording ka Jylla Abu Taher Mondal hynne ka Sngi Nyngkong, ula leit iashimbynta haka jingialang bad ki Nokma bad ki Nongialam Shnong ban iatai sani halor ki jingeh kiba mih naka kam pynbiang iaka bording elektrik ha Aminda Rangsa, Gambegre, West Garo Hills.
Ia u Myntri la synran lang da u Sanjay Goyal uba long u Commissioner & Secretary ka tnad bording bad ki heh ophisar jongka Meghalaya Electricity Corporation Limited (MeECL).
Haba kren haka jingialang u AT Mondal ula pynthikna ba ia ki mat kiba la pynsngew da ki khlieh nongsynshar yn sa shimkhia bha bad ula ong, “Haba ki ophisar kila odn lang ha katei ka jingialang, ia kitei ki jingeh lah ban ia kren pynbeit noh hi, kumta ki jingeh ha sor bad ha nongkyndong mynta ki long kumjuh hi”.
“Hapoh jong ki 5 snem ban wan, ka bording elektrik ha man la ki shnong kam dei ban don jingthud shuh. Dei ban buh ia ki Sub-Station ryngkat bad ki kor ki bor kiba katkum kane ka juk kaba mynta bad dei ruh ban pynbiang iaka Voltage” ula ong.
U Myntri u pyntip ba ka tnad kala sdang ban pynieng ia ka Sub Station ha Damalgre bad hapoh jong ka 2-3 bnai yn sa pyndep noh ia katei ka kam. “Ki don 3 tylli ki shnong hapoh Gambegre ki bym pat ioh ia ka bording elektrik bad ngin sa peit ba kidei ban ioh noh iaka bording elektrik. Ha ka por slap, ka jingdon ka eriong erngit bad ka jingslap bad ka jingpom pyrthat, ka don ka jingdkut ki sainar elektrik kumta dei ban pynbeit mardor ia katei. Man la ki longiing ha nongkyndong ki dei ban ioh ia ka bording elektrik” ong u Mondal.
U Myntri Sorkar ula lum iaka jingialang bad ka tnad Bording ha kaba iadei bad ki kam bad ki skhim kiba la pyntrei hapoh ka rilum Garo bad ula bthah ia ki ophisar ba ki dei ban peit ba ki paidbah katei ka thaiñ kidei ban ioh iaka bording elektrik khamtam hadien ba kala don ka jingther u lapbah bad kala don ka jingshah pynjulor jong ki sainar elektrik.
Katba u Sanjay Goyal ula ong ba la pynlong ia katei ka jingialang da ka jingthmu ban iohsngew bad ban sngewthuh ia ki jingeh kaba mad da ki paidbah bad kumno ban shim iaki lad ki lynti ban pynbeit mardor ia kitei ki jingeh.
“Ka jingialang mynta ka sngi kadei katkum ka jingbthah jong u Myntri Rangbah ka jylla bad u Myntri ka tnad Bording uba khmih ruh iaka tnad C&RD. Ngi mynta ngi dang pynleit jingmut ban khmih ia man la ki jaka bad ki Block ban peit ia ki jinglong jingman bad ia ki jingeh khamtam ha kaba iadei bad ka kam bording” ula ong.
