Shillong, Naitung 08 : Ka Khasi Students’ Union (KSU) ha ka sngi Nyngkong, kala nang pynjur ia ka jingtalasi work permit bad labour licence na ki bar jylla ba beh ruh da ki spah ngut ki nongbylla bar jylla kiba khlem kot khlem sla.
Ia kane ka jingtalasi la pynlong ha ka thain Mawlai bad Mawprem bad ka dei ruh shibynta ban pynbor ia ka Sorkar ba kan pyntreikam noh mardor ia ka Inner Line Permit (ILP) bad ka Meghalata Residents Safety and Security Act (MRSSA), 2016.
Ha kane ka jingtalasi, kala don ruh ka jingiarah placard kaba don ia ki jingthoh “Ngi don ia ka KHAD (Trading by Non-Tribal) Regulation , 1959. Ngi don ia ka Inter-State Migrant Workmen (Regulation of Employment and Conditions and Service)Act, 1979 kiba lah ban iakhun ia ka jingrung kyrthep ki bar jylla hynrei kito kiba don ha ka bor kim kwah satia ban pyntrei ia ki. Kumta, ngi ka KSU ngi don ia ka hok ban pyntreikam ia ki ain bala don lypa lane ban thaw ain na ka bynta ka Jaidbynriew haba kito kiba don ka bor kim shym la leh eiei”.
La sakhi ba ia ki nongbylla bar jylla ruh la pynrah placard lang kiba don ia ki jingthoh “Ngi lah ban rung da kaba suk sha Meghalaya namar ka dei kawei na ki Jylla ka bym treikam ka ILP ha ka thain Shatei Lam Mihngi ka Jylla” bad “Nga lah ban dei u nong Bangladesh hynrei mano ban tip ia nga?”.
U President ka KSU Mawpren Aristone Thabah ula ong “Ngi la pynlong ia ka jingkhynra ia ka work permit bad shem ba don da ki spah ngut ki nongbylla bar jylla ki bym biang ki kot ki sla”.
“Ngi na ka por sha ka por ngi ju pynpaw sha ka Sorkar halor ka jingdonkam ban pyntreikam noh ia ka ILP bad MRSSA hynrei kam shym seisoh. Ka jingtalasi mynta ka sngi ka dei ka jingsdang. Ngi phah ruh ia ka khubor kaba shai sha ki contractor ba ki dei ban pynthikna ba ki nongbylla ba ki wan ialam ki dei ban don ia ki kot ki sla kiba biang lem kumta ka KSU kan phah leit phai ia ki” ula ong.
Ha ka thain Mawlai, ka KSU kala ioh bat bad phah leit phai ia palat 117 ngut ki nongbylla bar jylla ki bym shym la lah ban pyni ia ki kot ki sla kiba biang.
