Shillong, Naitung 04: Ka Nongialam ka NPP bad MLA ka Sutnga-Saipung Kong Santa Mary Shylla ha ka sngi Palei, kala pynpaw ba kan da leit iakynduh hi markhmat bad ai khublei ia u MP ka VPP na Shillong Bah Ricky AJ Syngkon lada ka Jylla ka dang ioh biang sa T.290 klur ban maramot ia ka surok ba jot rathai jong ka National Highway-06.
“Ngi da kmen ba u MP ka Shillong ula shimkhia ha kaba ula ong ba ula pynioh ia ka mang tyngka ba T.290 klur. Naba ka Sorkar Jylla kala dep ioh lypa ia ka song pisa ba T.200.81 klur, kumta kan bha shibun ia ka Jylla jong ngi lada ka ioh biang sa T.290 klur, ka ban long haduh T.490 klur baroh lang” ong ka kong Santa haba iakren bad ki nongthoh khubor.
“Ngin da kmen shibun bad nga hi dalade ngan leit bad iakynduh ia u bad ai khublei ruh ia u namar ka jingpynioh ia kane ka song pisa” kala ong.
Kane ka Nongialam ka NPP na East Jaintia Hills kala kynthoh ia kane halor ka khubor ba kam ba ka Sorkar Pdeng kala pyn bna ia ka song pisa ba T.290 klur ban maramot ia ka surok NH-06 hadien ka jingiakynduh jong u Bah Ricky Syngkon ia u Myntri ka Road Transport & Highways (MoRTH) Nitin Gadkari ha ka sngi Balang.
Ka kong Santa kala ong ba ka jingshisha hi ka long ba ka Sorkar Pdeng kala dep pyllait ia ka song pisa ba T.200.81 klur naduh u bnai Risaw 2023 bad ka kam ban maramot ia ka surok ruh la dep ban ai sha ki arngut ki contractor.
“Ka jingpyntrei ia ka kam kala iaid shaid shaid. Kila sdang ia ka kam naduh u bnai Lber bad ka por ban pyndep ia ka surok ka long shisnem” kala ong.
Haba pynpaw ia ka jingsngewnguh ia ka Sorkar Jylla kaba pynthikna ia ka jingioh ia kane ka song pisa ba T.200.81 klur, ka kong Santa kala ong “Ngi da sngewnguh eh ia ka Sorkar namar ki paidbah ka East Jaintia Hills khamtam ha Ratacherra kila mad ia ka jingsyllang bad kila iakhih ruh na ka por sha ka por namar kane ka surok, kaba pynbor ia ka Sorkar ban shimkhia ha kaban iakren bad mynta ngi la ioh ia ka song tyngka ba T.200.81 klur. Ngi ai khublei ia ka Sorkar India bad ka MoRTH bad ngi kyrmen ba ngin nang ioh shuh shuh ia ka song pisa ha ki sngi ban dang wan”.
Haba pynpaw ba kam lah ban long ha kaban ioh ia ka song pisa tang shimiet, ka kong Santa kala ong “U Myntri ka Sorkar Pdeng ha ka jingshisha ula pyntip halor ka song pisa bala dep pyllait kaba long T.200.81 klur. Hynrei mynta sa kane ka song pisa ba kren u MP, ngam tip ka song pisa aiu ba u kren, ta ka daw nga la kulmar jingmut hynrei ka jingshisha hi ka long ba ka Sorkar Pdeng kala dep pyllait ia ka pisa ba T.200.81 klur naduh u Risaw 2023 bad kaba dang sah ka dang iaid ha ka jingpynkhreh.
Kat kum ka jingong jong ka, ka NHAI kala dep pynkhreh ia ka DPR bad ka dang ap mynta ban ioh ia ka jingmynjur. Kane ka song pisa ba dang sah ka long sa T.89.90 klur.
“Ka jingpynioh song pisa ba tang shimiet ka dei ka bym lah long satia, tang u Blei uba lah ban leh ia kata” kala kynthoh.
