Shillong, Naitung 01: Ka kynhun tohkit bala thung da ka Tnad Housing kan sdang ban leit jurip bad tohkit ban pynshisha ia ka jinglong jong ki tin sop iing ha ki 7 tylli ki District ka Ri-lum Khasi bad Jaintia Hills naduh ka 2 tarik Naitung.
Kane kala mih hadien ka jingujor jong ka seng Hynniewtrep Youth Council (HYC) pyrshah ia ka jingkynnoh sam tin sopiing ba tad dor hapoh ka Chief Minister Housing Assistance Programme (CMHAP).
Ka kynhun tohkit ka ba khlieh da u Joint Secretary ka tnad Housing LC Marak, kan leit jurip ia ki kudam jong ki Community & Rural Development (C&RD) Block ha East Khasi Hills naduh ka 2 tarik Naitung haduh ka 9 tarik, West Jaintia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaintia Hills ha ka 19 tarik Naitung bad South West Khasi Hills ha ka 20 tarik Naitung.
U Marak ha ka shithi ba 28 tarik Naitung, ula bthah ia baroh ki District Housing Officers (DHO) bad ki Block Development Officers (BDO) ba kin iadon hala ki jong ki Ophis ha ka sngi ba wan jurip ka kynhun tohkit ban pynshisha haba iadei bad ka jingkynnoh sam tin sopiing ba tad dor kumba kynnoh da ka sengbhalang.
Lah ban kdew hangne, ia kane ka tin sop iing la shalan da ka kompani Hariana Iron Works Pvt Ltd, Kolkata, West Bengal bad la pynpoi ia kine ki tin sha baroh ki District bad ki Block ka Jylla.
