Shillong, Jylliew 30: Ka samla Lamerphylla Damesha Kharsati kala wanrah nam iaka Ri daka ba khur iaka takma rnong haka 23rd Milo Open International Karate Tournament bala long hapoh ka nongbah Kuala Lumpur ka Ri Malaysia.
Ka samla Lamerphylla kala iakhun haka thup 68 kg jong ki kynthei haka jingialehkai kumite bad kala lah ban pyni iala ka sap ha kane ka jingiakhun bala long ha Titiwangsa Indoor Stadium naduh 26 haduh 30 tarik Jylliew 2024.
Ka jingjop ha kane ka lympung ka pyni iaka jingtrei shitom jong ka samla Lamerphylla bad kane ka jingkhur takma rnong nalor baka wanrah nam iaka Ri, ka pyni ruh ba kane ka samla ka ioh mynsiem shuh ban trei shitom naka bynta ban iakhun bad wanrah burom iaka Ri haki snem ban wan lyngba ki jingkyrshan.
“Ban iakhun haka rynsan International bad ban khur takma kadei ka jingsarong kaba khraw. Nga ai khublei ia baroh namar nga la lah ban mihkhmat iaka Ri bad nga kular ban nang trei shitom shuh shuh naka bynta ki jingiakhun haki snem ban wan” kala ong.
Ka jing ioh khur takma ka samla Lamerphylla ka ai mynsiem ia kiwei kiba don ka mynsiem shim khia haka kam ialehkai bad ka ai mynsiem ia kiwei ban trei shitom.
