Shillong, Jylliew 27 : Ka Meghalaya Lokayukta hynne ka sngi Palei, kala phah notice sha ki 10 ngut ki Ophisar barim ka Sorkar Jylla bad ka Meghalaya Energy Corporation Limited (MeECL) halor ka jingujor kynnoh bamsap ha ka jingpyntreikam ia ka Saubhagya Scheme.
Ia kane ka jingujor la mudui da u MLA ka Voice of the People Party (VPP) ka North Shillong Bah Adelbert Nongrum myn ha ka 12 tarik Jylliew.
Kane ka ujor ka long pyrshah ia u Chief Secretary barim, u Additional Chief Secretary barim (Power), Chairman cum Managing Director (CMD) ka MeECL bad ki Heh Ophisar ka MePDCL ba kynthhup ia u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad Additional Chief Engineer (Planning & Design).
La pynshong nongrim ia kane ka ujor kat kum ka kaiphod jong ka Comptroller and Auditor General of India on Social and Economic Sectors jong u snem ba kut 31 tarik Lber, 2022.
Ha ka hukum bala pynmih da u Chairperson, Meghalaya Lokayukta Bah B Dhar hynne ka sngi Palei la ong “La iohi ia ka ujor ba 12 tarik Jylliew bala mudui hapoh ka kyndon 13(I)(a) jong ka Prevention of Corruption Act, 1988, da u Bah Adelbert Nongrum. Phah notice sha baroh ki nongshah mudui bala kdew kyrteng bad suh lang ia ka copy jong ka jingujor”.
Kala bthah ruh “Naba, ka jingkynnoh ha ka jingujor ka mudui da kaba pynshong nongrim na ka kaiphod Comptroller and Auditor General of India (CAG) bala mudui sha ka Meghalaya Legislative Assembly, phah ia ka notice bad ka copy jong ka shithi ujor sha u Commissioner and Secretary ka Meghalaya Legislative Assembly”.
Ka hukum kala bthah ban buh ia ka 23 tarik Naitung ha ka por 2 baje janmiet ban shong bishar halor ka jingieng nongrim jong kane ka ujor.
Ha ka ujor, u bah Adelbert ula ong “Ia kane ka ujor la mudui hapoh ka kyndon 13(1)(a) jong ka Prevention of Corruption Act, 1988 halor ka nongrim ba ki nongtrei Sorkar bala kdew haneng, kiba don ha ka kam ha katei ka por jong u snem 2018, kila bam klop ia ka pisa bala buh ha ka jingpyniaid jong ki kum ki shakri Sorkar lane ailad ia kiwei pat ba kin leh”.
Ula ong ba ka Chapter 3 jong ka kaiphod CAG ba iadei bad ka jinglap ka Audit halor ka jingtreikam ki State Public Sector Enterprises, bad ka para 3.3 jong ka kaiphod ka pyni ia ka jingshem ia ka jingpynlut haduh T.156 klur ba lah ban kiar hapoh ka MePDCL, ka jingshem kaba sngewkhia ia ka jingpynlut pynsep ia ka pisa u paidbah.
“Wat hapdeng ka jingbthah bala pynmih da u Cabinet Secretary, ka rai bym shonghok jong ka MePDCL ban ai kam hapoh ka SAUBHAGYA sha ki Contractor ha ka dor ba ki buh, kala lam sha ka jingpynlut ba lah ban kiar, kaba kot haduh T. 156.14 klur” ong u Bah Adelbert.
