Shillong, Nailar 11 : Ki nongshet bamja sngi ha ki skul hapoh ka lama jong ka Meghalaya Midday Meal Workers Union ki la byrngem ba kin shim noh da ki sienjam kiba kham tyngeh lada ka sorkar kam kyntiew noh ia ka jingsiew kaba ki ioh baroh shi katta.
Haba kren bad ki lad pathai khubor, ka President jong ka Union Kong Bilin Kurbah ka la iathuh ba ki don haduh 18000 ngut ki nongshetja sngi ha kylleng ki bynta jong ka jylla kiba la trei wat hapdeng ka jingsiew kaba duna ba ki ïoh na ka sorkar.
“Baroh ki nongshetja sngi ha ki skul ki ïoh tang 1000 tyngka shi bnai kaba ngi kum kiba trei ia kane ka kam ngi mad ia ka jingeh kaba khraw ban pyndap ia ki jingdonkam ha iing. Kumta ngi kyrpad ia ka sorkar ba kan pyrkhat lem na ka bynta jong ngi ruh khnang ba ngi ruh ngin ioh lang ia ka hok ban im” bynrap biang ka President.
Ka kynhun ka la pynpaw ruh ba ki kwah ba ka sorkar kan pyni noh da ki kam naduh mynta u bnai lym kumta kim banse ban pyni noh da ki lynti kiba kham tyngeh ban pynbor ia ka.
Na ka liang u Babu Kenneth Shadap u la iathuh ba ki la dep ruh ban ia kynduh bad ki heh sorkar hynrei na ka liang jong ki ki pynpaw ba ki long kiba kloi ban iarap tangba ka rai kaba khatduh ka shong ha kiba don ha bor.
“Ka sorkar kadei ban pyrkhat lem na ka bynta jong ki khnang ba ki ruh kin ioh lang ia ka hok ban im. Ka sorkar kadei ban peit ba ka jingsiew kan long kaba iahap lem bad ia ryngkat katkum ka jingiaid jong ka por,” u la ong.
