Shillong, Jylliew 17: Ka Sorkar kala kular ban sa pyndep noh ha u Naitung ia ka jingtei jong ka RMSA Higher Secondary School ba don hapoh ka shnong Aruakgre, North Garo Hills.
Ka kyrwoh bala pynmih da u Director of School Education hynne ka sngi Nyngkong la ong “Ka Sorkar Meghalaya ka ieng ryngkat bad baroh ki Nonghikai bad ki samla pule ka Jylla.
Ngi la pyrshang ban weng ia ki jingeh jong ki khynnah skul bad ki Nonghikai ha ka shnong Aruakgre, North Garo Hills bad ngi pynthikna ba ngin weng lut pura”.
“Ka jingtei ia ka RMSA Higher Secondary School ha ka shnong Aruakgre ka dei kaba la mynjur ha ka jinglut ba T.97.04 lak. Ngi kwah ban pyntip sha ki paidbah ka NGH bad ka Jylla ba kane ka project kala don ha ka khep satang ban pyndep noh bad yn da pyndep ia ka hapoh u Naitung 2024” kala ong.
U Director ula pyntip ruh ba ka jingpyndep ba dang shen ia ka surok PMGSY hajan ka Gokol kala nang pynjanai ia ki lad pyniasoh sha Aruakgre. Ka jingshna ia ka surok ha kajuh ka por, kane ka jingtei hapoh ka skul, ka dei ka sakhi ia ka jingshimkhia jong ka Sorkar ban pynthikna ba baroh kin ioh ia ka pule ka dangle kaba bha”.
