Shillong, Jylliew 14 : U Myntri Rangbah ka Jylla, Conrad K Sangma, hynne ka sngi Thohdieng, ula leit iashimbynta ha ka Convocation ba 5 jong ka ICFAI University, kaba la pynlong ha State Convention Centre, Shillong.
Ia u Myntri la synran lang da u Myntri ka tnad Pule Puthi Rakkam A Sangma, u Chancellor Lt General (Dr) Arvinder Singh Lambha bad ka Vice Chancelor Dr Alicia Gatphoh.
Haba ai jingkren sha kumba 600 ngut ki samla pule Under Graduate bad Post Graduate kiba la pyndep ia ki jingpule ha ki course bapher bapher bala tyrwa da ka University, u Myntri rangbah ula ong ba ka Convocation ka dei ka khyllipmat kaba batai ia ka jingim ki samla pule bad bynrap ba ki samla ki dei ka bor ba khlaun duh bad ruh ka jingtynjuh ia kano kano ka Jylla ne ka Ri.
“Ka India ka dei ka Ri kaba kiew sted bha ha ka ioh ka kot bad ki University bad ki jaka pule kila iatrrei ryngkat ryngkat ban saindur ia ki samla ba kin don bynta ha ka jingkiew shakhmat ka ioh ka kot da kaba shim kabu ia ki lad ki kabu kiba donkti ha kane ka jingkiew ka ioh ka kot” ula ong.
Ula pyntip ruh ba ki samla ki dei kiba kongsan bha ha ka jingkiew ka ioh ka kot ha Meghalaya bad u Myntri Rangbah ula kren bniah bha halor ki katto katne ki prokram jong ka Sorkar Jylla ha ka kam jngohkai, IT bad kiwei kiwei ha kaba ki samla ki dei ia kiba la phaikhmat duh.
U Myntri Rangbah ula kyntu ruh ia ki samla ba kin long kiba angnud ban sengkam lyngba ki buit ba ki don bad bynrap “Phaikhmat sha ki lad sengkam da ki buit ba phi don, ka Sorkar ka long tang ka nongplie lad plie lynti ym ka nongniah ia ka kali jong ka ioh ka kot”.
Ha kane ka sngi, u Myntri Rangbah bad kiwei ki kynrem ki lyndankila sam ruh ia ki khusnam General Proficiency Award, UG bad PG Merit Certificates nalor ki khusnam sha kiba ioh Gold bad Silver Medal.
