SHILLONG, JUNE 13: Ka Meghalaya State Education Commission (MeSEC) kala leit jurip ha kylleng ki jaka ka rilum Garo ha kine ki 3 sngi bala leit bad la ioh ruh ia ka ‘jingkren ba kyrpang’ halor ka phang “Christian Medical Mission in North East India” na u Professor David Reid Syiemlieh, Chairman barim ka UPSC bad Adviser ka Commission.
Ia katei ka prokram la pynlong da ka Tura Christian College (TCC), Tura ha Working Women’s Hostel, AB Mission Compound, Tura ha ka sngi Balang.
Haba ai jingkren, u Prof Syiemlieh ula ong, ba ka Christian Medical Mission ha North East India ka dei kawei na ki bynta kaba la shah iehbeiñ bha ha kaba liang ka pule puthi bad ula kyntu ia ki Scholar kiba dang samla na Tura ba kin thoh ia ki jingthoh bad ban wad bniah halor katei ka sobjek.
Ula pyntip ba ula leh bun ki jingwad bniah halor ka jingnoh synniang ki Baptist Missionaries khamtam ha kaba iadei eh bad u Thomas Jones jongka Presbyterian Mission, bud pat sa ka jingwad bniah halor ki mishon kiba la leh da ki Balang Khristan ha kaban pynsaphriang ia ka ktien u Blei, ka pule puthi bad ka jingai jingshakri lyngba ka jingai jingsumar ha ka thaiñ shatei lammihngi.
Ula iathuh ruh, ba ula jied ban kren halor katei ka sobjek kadei ban iada ia ka jingtrei met bad mynsiem jong ki mishoneri bad ban pynshlur ia ka jingpule ha ka histori halor kane ka khana jong ka jingshakri ki mishoneri ha ka thaiñ shatei lammihngi bad ula batai bniah ruh halor ka jingwanpoi ki mishoneri ha kathain shatei lammihngi jong ka ri, ha kaba ula batai bha ha kaba iadei eh bad ki Baptist Missionary bad ka jingtei ia ki jaka ai jingsumar bad u synniang uba kila noh kyrhai sha ki paidbah jong ka thaiñ shatei lammihngi khamtam eh ha rilum Garo.
Katba ka Chairperson jongka MeSEC, ka Professor SM Sungoh kala kren halor ka “Work Culture and Ethics” ha kaba kala pynkynmaw ba kum ki nongai jinghikai ki don ia ka kamram kaba khraw ha kaban saiñdur ia ka jingmut jingpyrkhat bad ia ka sap jong ki samla pule.
Kala ong ba ka mishon kala iaid palat ym tang ha kaban ai ka jingnang jingstad hynrei kin hap ban pynheh pynsan, ai mynsiem, ban pynkupbor ia ki khynnah pule bad ki sap ki phong bad ban ai jingkyrshan ia ki ha kaban nohsynniang na ka bynta ka jingkiew na ka bynta ka pateng ban dang wan.
Kala kdew ruh halor ka jingpyntreikam ia ka National Education Policy (NEP) 2020 da ka sorkar India ban pynbiang ia ki jingdonkam jongki khynnah pule ba kin iakhun pyrshah ia ki jingeh ha ki pateng ban wan bad ba kin noh synniang bha naka bynta ka lawei jong ka imlang sahlang.
Katba u Secretary ka pule puthi ka jylla u Ambrose Ch Marak ula pyntip ba ki dkhot jongka State Education Commission kila wan ban sngewthuh ia ki jingeh bad ban sngap ia ka jingpynpaw bad jingpynsngew jong baroh kiba donbynta lang kiba kynthup naduh ki riewrangbah, ki riewshemphang, ki kynhun bapher, ki khlieh jong ki jaka pule ban ai ia ki jingsngew ki jongki halor ka jinglong jingman jong ka pule puthi kaba mynta haka jylla Meghalaya bad ban weng ia kitei ki jingeh kiba mad bad ban iakren ruh halor ki jingai jingmut khnang ba ka tnad kan lah ban iatai bad ban aiti ia ka kaiphod sha ka sorkar.
Nalor kane la ioh ruh ia ka jingkren na u President ka Governing Body ka Tura Christian College (TCC) u Tony T Ch Marak, ka Assistant Professor jongka Department of Sociology ka Kong Lakyntiewhun Sohtun, ka Assistant Professor, Department of Education, Earlitha M Sangma bad la wan ban iashimbynta lang da ki nonghikai, ki ophisar kiba la shongthait na ka kam, ki khlieh jong ki jaka pule, ki dkhot jong ki Governing Body, ki dkhot jong ki kynhun bad kiwei kiwei.
