SHILLONG, JUNE 13: Ka Kong Pinki Maring, ka riewpawkhmat ka jylla kaba la ioh ia ka nam Mrs. World Peace 2024 kala shah pynkup burom hynnin ka sngi Balang ha Ahmedabad.
Ka Kong Maring kaba dei ka Miss Meghalaya kaba nyngkong eh ha u snem 1998, kala shah pynkup burom ha ka Samata Sahitya Academy, halor ka jingioh ka jong ka ia ka pansngiat Mrs. World Peace 2024 ha ka 1 tarik u Jylliew 2024, ha Leela Hotels and Resorts, Ambience Mall Gurgaon.
Ka Kong Maring kadei kaba mihkhmat ia ka jylla Meghalaya ha katei ka jingiakob bad ka jingjop ka jong ka kala pyni ym tang ia ka jingtbit ka jong ka hynrei kala long ruh ka jingsngewsarong ia ka jylla bad ia ka ri baroh kawei.
Ka Kong Maring kala ai khublei kyrpang ia ka Director ka jongka, ka Bharkha Nangia, kaba la btin bad ialam ha ka lynti iaid ka jong ka bad kala pynpaw ruh ia ka jingsngewnguh ia ki nongpyniaid ia ka National Samatha Conference, Ahmedabad 2024 kiba la pynkup burom ia ka.
Katei ka jingpynkup burom ia ka kong Pinki Maring ka long kum shi bynta ban ai jingithuh ia ka jingnoh synniang ka jongka ha kaban kyntiew ia ka suk ka saiñ bad ban pynsngewthuh ia ki nongpeitkai ha ka rynsan jong ka pyrthei shaphang ka kolshor bad kala ioh iaka jingiaroh halor kane ka jingleit iashimbynta bad kala long ruh kum ka jingai mynsiem halor ka jingtrei shitom ka jongka bad ia ka jinglong kordor ka jongka.
Ka Kong Pinki Maring kala bteng ban long kum kata ka briew kaban ai mynsiem ia kiba bun halor ka jingkular ka jongka ban wanrah iaka shongsuk bad ka jingmihkhmat ka jongka na ka bynta ka Meghalaya haka rynsan jong ka pyrthei.
