Shillong Jylliew 12: Ka sorkar jylla haka sngi Balang kala pyntip ba shen ka Tnad Tourism kan sa khot tender na ka bynta ban maramot ia ki bynta ba shapoh jong ka Pinewood Hotel shisien ba la dep bad ioh jingmynjur ka Detailed Project Report (DPR).
“Ngi kwah ban pynshai ba kam shym la don kano kano ka jingaiti ia ka kam sha u Vikram Singhania. Ka tnad kan sa khot ia ka tender naka bynta ban maramot bad pynbha shisien ba ka sorkar kala dep ai jingmynjur iaka DPR. Ka jingkhot Tender kan long ha ka lynti kaba khuid ba suba, ka ban ailad ia baroh ki kontraktor ka jylla ban iahsimbynta” ong ka Kong BL Lyngdoh na ka bynta ka Meghalaya Tourism Development Corporation (MTDC) lyngba ka kyrwoh khubor.
Kila pynthikna ruh ba ki kontraktor ka jylla kiba la pyndep ia ki jingbuh kyndon da ka Engineering Wing jong ka tnad, kin ioh nyngkong ia ka lad ban pynthikna ia ka jingiadonbynta lang ka imlang sahlang bad ioh jingmyntoi.
“Ngi pynthikna ia ki paidbah bad ia baroh kiba donbynta ba ka jingmaramot bad jingpynbha iaka Pinewood Hotel kan iaid ha ka kyrdan kaba hajrong jong ka jingkhuid jingsuba bad ka jingailad ia baroh” ong ka Kong Lyngdoh haba bynrap ba ka sorkar ka iengskhem ha kaban bat ia ki jinglong kyrpang ha ka jingpyniaid ia katei ka projek, ban ai ia ka jingshaniah bad ban pynthikna ba katei ka projek kadei ban long kaba seisoh bad ban pyndep ha ka por kaba la buh.
La pyntip ruh ba katei ka projek ka thmu ha kaban kyntiew iaki jingdon jingem jong katei ka jingtei kaba don nam, ban pynthikna ba kan don iaka jingkyntiew katkum ka jingiaid ka por hynrei yn pynneh pynsah pat ia ka jinglong rim bad kyrpang jong katei ka jingtei.
Kumba long mynta ka jingpynkhreh ia ka DPR ban maramot bad pynbha ia ka Pinewood Hotel ka dang iaid shakhmat bad ki kam kiban leh ki kynthup ia ka jingpynbha ia ki bynta kiba shapoh jongka Banquet Hall, Kitchen, Restaurant, Restaurant extension, Coffee Shop, Lobby & Reception, Conference Room ryngkat bad ka jingkyntiew ia ki Furniture, Lighting, bad HVAC.
Ka MTDC kala pynshai ruh ba katei ka jingmaramot bad jingshna pynbha ka kynthup iaka jingdon lypa jong ki jingtei da ki dieng, kiba bun ki kam ki jam ia kaba la dep ban khmih bniah lypa.
“Halor katei la pyndonkam ia ki nongtrei bylla na ka bynta ban pynhap ia ki bynta jong ka sad bad ia ki lyntang dieng kiba siang ha ka kitchen, restaurant bad banquet hall hapoh ka jingkhmihbad jingpyniaid jong ka Design Consultant. Kane ka bynta ka long kaba kongsan bha na ka bynta ban khmih bniah bad ban peit ia ka jinglong jingman jong kajingtei bad ban batai bniah ia ki kam ki jam kiba hap ban trei kiban donkam ha ka DPR kaba pura bad la pyntip ba ka Rose Studio Private Limited, kaba dei ruh kajuh ka kynhun kaba la pynwandur iaka Meghalayan Age Store ha New Delhi, la pyndonkam ia ka kum ka Design Consultant na ka bynta kane ka projek.
