Shillong, Jylliew 08: Ka Synjuk Ki Rangbah Kur Ka Bri U Hynñiewtrep, kala pyniar ia ki shnat treikam jongka mynta sa ha rilum Jaintia ha kaba la jied ia ki nongkitkam jong kane ka shnat ha ka jingialang kaba la long ha Ialong Dorbar Hall.
Ka SKRKKBUH kala don ia ki shnat treikam ha East Khasi Hills, West Khasi Hills, South West Khasi Hills bad mynta sa ha Jaintia Hills da ka jingthmu ban iada ia ki riti dustur tynrai.
Ha kane ka sngi la ioh iaka jingkrne na u Bah Erwin K Syiem Sutnga bad u Bah Raphael Warjri bad kiwei kiwei ki riewrangbah ka thaiñ ha kaba kila pynpaw ia ki jingeh kaba ki iakynduh ha ka imlang sahlang kaba la ktah shibun khamtam ha kaba la khynra ia ki riti dustur tynrai da ki riewshimkabu ban myntoi lyngba ka khaii pateng bad kiwei kiwei ki jingmyntoi kum ki riewlum jong ka jylla.
La seng ia ka Synjuk ha u snem 2019 ha ka por ba dang long CEM u Bah H.S Shylla ha ka Khasi Hills Autonomous District Council (KHADC) kaba la maitphang ban buhti da ki atiar jong ka aiñ ban shna ki aiñrew kiba dei ban iada ia ka jaitbynriew. Haduh mynta kita ki aiñrew ki dang sahteng ha ka sorkar jylla bad khlem pat ioh ka jingmynjur na u Lat ka jylla ban pynlong aiñ pura, hynrei ka Synjuk ka dang iaid shitrhem ban kyntu ia ka sorkar ban pynurlong ia ka jingthrang jong ki paidbah ka jylla. Halor katei ka nongrim, ki rangbah na Jaintia Hills ruh kila ia synrop lang bad ban ia phah lang ia ki jingthoh sha ka Jaintia Hills Autonomous District Council (JHADC) na ka bynta ban pynlong aiñ noh kham kloi.
Ha kane ka jingialang la jied ruh ia ki dkhot nongkitkam ia ka shnat jong ka Synjuk Ki Rangbah Kur Ka Bri U Hynñtrep kaba la jer da ka Dorbar Ki Waheh Kur Ri jaintia, kiba la shah jied kum ki nongkitkam ki kynthup ia u Bah Khroo Lamsalanki Pariat kum u President, Bah Pyrkhat Shylla bad Bah D Donstan Khonglah kum ki Vice President, Bah Hamkhian Dkhar kum u General Secretary, Bah Gremalin H Bareh kum u Assistant Secretary, u Bah Abutt Nelson Muksor kum u Treasurer, u Bah Standbyme Sari kum u Media Secretary bad baoh ki rangbah kum ki longsan mansan ha ka Dorbar Nongkitkam kiba dei artad ki khlieh rangbah jong ki Kur ha la ki thaiñ.
Ka Synjuk kala pynkhreh ruh ban iashem bad ki Rangbah Kur na ka thaiñ Ri Bhoi ha ka 11 tarik Jylliew 2024 ha Shillong na ka bynta ban seng ia ka shnat ha Ri Bhoi, khamtam haba ha kine ki khyndiat bnai kiba la dep, kala don ka jingiasyllok bad ki Rangbah Kur na Ri Bhoi bad la khmih lynti ba yn sa urlong noh kloi khamtam ban pynlong ia ka Dorbar Pyllun ha u bnai Nailar 2024.
