Shillong, Jylliew 07 : Ka Shillong Municipal Board (SMB) kala ujor ejahar hakhmat u Superintendent of Police ka East Khasi Hills, halor ka jingmih ki briew kiba leit khrong pisa beain na ki nongshong dukan madan hapoh Nongbah Shillong.
Ia kane ka ejahar la mudui da u Chief Executive Officer (CEO) ka Shillong Municipal Board (SMB) hynne ka sngi.
Kat kum ka ejahar, u CEO ula pyntip ba ki don ki briew ( bym lah ban ithuh), kila leit lum pisa na ki nongshong dukan madan bad pyndonkam ia ka receipt thok jong ka SMB ha ka nam ban pynrung kyrteng (registration) ia ki, ia kaba ka Town Vending Committee (TVC) lyngba ka Ophis (SMB) ka dang pynlong mynta.
Ula pyntip ba ka TVC ka dang pynrung kyrteng mynta ia ki Nongshong dukan madan kat kum ki kyndon jong ka Meghalaya Street Vending ( Protection of Livelihood and Regulation of Street Vending), Scheme 2023.
Ula pyntip, ba kat kum kane ka ain, kam don satia kano kano ka jingshim pisa ban pynrung kyrteng (Registration Fee) da ka TVC ia ki nongshong dukan madan.
U CEO ula iathuh ruh ba ka Ophis (SMB) kala ioh pdiang ia ka jingujor halor kane ka kam na ka Meghalaya & Greater Shillong Progressive Hawkers & Street Vendors Association (MGSPHSVA).
Halor kane, u CEO ula kyntu ia u SP ba un shimkhia ban leh eiei pyrshah ia kine ki briew kat kum ki kyndon ka ain.
 kala ujor ejahar hakhmat u Superintendent of Police ka East Khasi Hills, halor ka jingmih ki briew kiba leit khrong pisa beain na ki nongshong dukan madan hapoh Nongbah Shillong.){kind=link}