Shillong, Jylliew 07: U President ka Voice of the People Party (VPP) Bah Ardent M Basaiawmoit ha ka sngi Thohdieng ula bthah ia u Myntri Rangbah ka Assam Himanta Biswa Sarma ban khmih iala ka jong ka kyrpong ha ka jaka ban mushlia/tuklar ia ki kam ki jam ka Meghalaya.
Haba pynrem ia ki jingkynthoh u Himanta ba don ka niam ha Meghalaya kaba pynlong ia ka jingshah rem ka NDA ha ka elekshon Lok Sabha ba dang shu dep, u Bah Ardent ula ong “Kane ka dei ka khubor kaba nga kwah phah sha u Himanta Biswa Sarma, u Myntri Rangbah ka Jylla, uba ju krem lamwir lamtham bad um dei ban tuklar ia ka kam kiwei hynrei ban khmih iala ka jong ka kyrpong. Um don hok satia ban tuklar ia ki kam jong ka Jylla Meghalaya haba iadei bad ka elekshon ba dang shu dep”.
“Ha ka riti synshar paidbah kum ka India, ki paidbah ka Meghalaya ki don iaka hok ban jied ia uno uno u briew katba u dang dei hi u nong India bad uba lah ban long u kyrtong. Ki paidbah ka Meghalaya kim dei kiba biej, ban ym tip ia ki jingthmu, ki thong, ki mat jong kiwei pat ki seng sain pyrthei kiba iashimbynta ha kane ka elekshon. Bad kum ki nongshongshnong kane ka Ri Synshar paidbah, ngi don ka hok ban jied ia kano kano ka party kaba ngi kwah” ula bynrap.
Haba pynpaw ba ki Niam/Balang ha Meghalaya kim ju don bynta ha ki kam elekshon, u Bah Ardent ula ong “Hynrei, kum ka Jaidbynriew, ngin jied ia ka party ne kyrtong kaba ngeit ha ka riti synshar ka ri, burom ia ki kyndon ka riti synshar ka ri India, kaba ngeit ia ka jingburom ia baroh ki jaid niam bad ka party kaba iada ia ka hok ki rit paidbah. Kumta phim lah ban khmih lynti ba kum u Khristan, ngan vote ne jied ia u briew uba dei na ka party kaba ieng pyrshah ia ka riti synshar ka ri, ka bym burom ia kiwei ki niam bad ruh kaba buh jingma ia ki rit paidbah jong ka ri”.
“Namar kata, nga pynrem jur ia ka jingkren u Himanta ka bym dei hi ruh ka jingshisha, ka bym don nongrim bad kaba sngew iapher niam. Ka jingkren jong u nga hi ka dei tang ka jingialam bakla ia ki paidbah bad wanrah ia ka jingsngew iapher hapoh ka Ri. Nga thikna ba kane ka jingkren kala wanrah ia ka jinglehrain ia ki paidbah ka Assam bad kala ktah jur ia ka jingsngew ki paidbah ka Meghalaya” ong une u Heh kaVPP.
 Bah Ardent M Basaiawmoit ha ka sngi Thohdieng ula bthah ia u Myntri Rangbah ka Assam Himanta Biswa Sarma ban khmih iala ka jong ka kyrpong ha ka jaka ban mushlia/tuklar ia ki kam ki jam ka Meghalaya.){kind=link}