Tura, Jylliew 04 : U kyrtong ka Congress Saleng A Sangma, ula knieh ia ka jinglong nongmihkhmat sha Lok Sabha na Tura parliamentary seat na ka Agatha K Sangma, kaba pynkut ia ka jingioh mihkhmat ba palat 40 snem na ka Longiing jong u (L) P.A. Sangma.
U Saleng ula jop da palat 1.3 lak vote ban pynliem ia ka Agatha ha baroh 24 tylli ki Assembly constituency jong ka Tura Lok Sabha seat.
Wat ka South Tura kaba mihkhmat da u Myntri Rangbah ka Jylla Conrad K Sangma, kala ai vote bun eh ia ka Congress.
Ka North bad ka South Garo Hills District ki dei ki ktem ba khlain bha jong ka NPP hynrei mynta ka kynti kala shah pynpra phom ha ka Congress bad man ki Assembly constituency na kine ki District, kila ai vote ia u Saleng.
Ki Nongthep vote ka North Garo Hills District kila bitar ia ka Sorkar u Conrad K Sangma hadien ka jingiohi ba ym don uwei ruh na ki 4 ngut ki MLA ba kin ioh long Myntri ha ka Sorkar ha u snem bala lah.
Ka jingjia bad Manipur bad Assam ruh kala pynkhuslai bha ia ki paid nongthep vote ha Garo Hills khamtam hadien b aka NPPbad ka BJP kila iatreilang da ka jingsangeh iakhun ka BJP ia ka elekshon ban kyrshan ia ka kyrtong ka NPP.
Ka vote ia ka NPP ka dei ka vote ia u Modi ka dei ka jingsngew jong kiba bun ki nongthep vote ha Ri-lum Garo bad kila pyni ia ka jingbitar lyngba ka ballot.
Watla ka Congress ka don tang uwei u MLA ha ka thain kata u Saleng A Sangma katba ka NPP ka don 18 ngut bad uwei u MLA shimet, kim shym la lah ban tem ia ka lyer kaba beh sha ka Congress.
