Shillong, Jylliew 3: Ka Tnad Pulit ka Jylla kala pynlong ia ka 3rd Shillong Open Shooting Championship 2024 ba arsngi kynthih hapoh ka Meghalaya Police Shooting Club indoor shooting range kaba don ha Police Reserve, Shillong.
Kane ka jingiakop iasiat suloi ka dei kaba la pynlong ha ka 1 tarik bad 2 tarik u Jylliew bad haduh 67 ngut ki nongsiat suloi kila iashimbynta ha kane ka jingiakop ba kynthup ia 45 ngut kiba iasiat Air rifle bad 22 ngut ha ka Air pistol.
Kane ka jingiakop ka dei kaba la pynlong ha ki 6 bynta kata ka sub youth naka bynta ki khynnah ba hapdeng 11-16 snem, youth 16-18, Junior 18-21, Senior 21-45, Master 45-60, Para bad Rifle bad pistol na ka bynta kiba duna dkhot met.
Ha ka sien ba nyngkong, ki don haduh 8 ngut ki nongiashimbynta na ka School & Centre jong ki Hearing Handicapped Children, Laitumkhrah kynthup iwei ka para shooter.
Ia ki takma la sam da u Superintendent of Police ka East Khasi Hills Rituraj Ravi uba dei ruh u Kongsan ha kane ka sngi pynkut.
Haba ai jingkren, u SP ula ai khublei ia baroh kiba ioh khur takma bad pynshlur ba kin bteng ha kaban nang khur shuh shuh ia ki khusnam ha kane ka jingialehkai.
U kongsan ula ai khublei ruh ia ka jingtrei shitom u DIG Davis N Marak halor ka bynta jong u ban seng ia ka Meghalaya Police Shooting Range ha Police Reserve Shillong. Ula ai khublei ruh ia ka jingtrei shitom u President JF Kharshiing bad u Secretary Neil Sootink na ka Shooting Association of Meghalaya ha ka jingkyntiew ia kane ka jingialehkai siat suloi.
