Shillong, Jylliew 03 : Ka Tnad Pule Puthi ka Sorkar Jylla, kala pynbna bala plie ia ka jingpynrung klas ia ki samla pule Under Graduate (UG) jong ka Arts stream ha ki artylli ki Degree College ba thymmai ka Jylla.
Kine ki artylli ki College thymmai ki dei ka Rongjeng Model Degree College ha East Garo Hills District bad ka Patharkhmah Model Degree College ha Ri-Bhoi District.
Kine ki artylli ki College kila pdiang mynta ia ki aplikeshon ban pynrung klas na ka bynta u snem 2024-2025.
Haba pynbna ia kane lyngba ka ‘X’, u Rakkam A Sangma ula ong “Nga kwah ban pyntip sha phi ba ka Tnad Pule Puthi, ka Sorkar Meghalaya kala pynbna ban sdang ia ka jingpynrung klas ia ki UG Course ha ki artylli ki Model Degree College ha Rongjeng Model Degree College, East Garo Hills bad Patharkhmah Model Degree College, Ri-Bhoi. Kane ka dien ka sienjam bala shim ban pynurlong ia ka jingangnud bad jingdonkam ki paidbah haka pule ka puthi”.
