Nongpoh, Jylliew 03: U Deputy Commissioner ka Ri Bhoi District u Arpit Upadhyaya, hynne ka sngi Nyngkong, u la lum ia ka jingïalang bad baroh ki seng Saiñ Hima na Ri Bhoi District, ban pynthikna ba ka jingniew vote jong ka elekshon Lok Sabha kan long kaba iaid beit iaid ryntih lashai ka 4 tarik Jylliew.
U DC ula lum ia kane ka jingialang ban ïakren halor ka jingdonkam ban pynneh ïaka suk ka saiñ bad ban nym pynmih ia kano kano ka huri hura haka sngi ñiew vote.
Ïa kane ka jingïalang la pynlong ha Conference Hall jong ka ophis u Deputy Commissioner ha ka jingiadon ryngkat ki AROs, ki Observers, ki heh pulit ka Ri-Bhoi bad ki nongmihkhmat naki seng saiñ Hima bapher bapher.
Haba iakren bad ki nongthoh khubor, u DC u la ong ba katei ka jingïalang ka long ban ïakren kyrpang halor ka jingpyn khreh naka bynta ka sngi ñiew vote ka ban long lashai ka sngi, bad ban ai jingshai sha ki seng saiñ hima halor ki kyndon ban pyntreikam lashai ka sngi ñiew vote.
U DC u la bthah ruh ïaki nongïalam jong ki seng saiñ pyrthei bad ki paidbah ba kim dei ban pynmih kano kano ka huri hura.
Ula pyntip ruh b aula pynjari ia ka kyndon aiñ 144CrPC ha baroh kawei ka District kaba khang pyrshah ïaki seng saiñ pyrthei ban pynlong jingïalang bad lehkmen paidbah khlem ka jingioh jingbit naki bor ba dei peit.
