Shillong, Jylliew 02: Ym duna iaka 70% ki nongshong shnong jong ka Jylla Meghalaya ki dei ki nongrep bad ka jingiabeh ia ka rep ka riang kala pynlong iaki paidbah naduh ka por ki myn barim, ba kin leit thaw shnong sha ki jaka ba sei soh kam pher la kin tur sha ki jaka riat ne sha jan jong ki wah.
Ha Meghalaya ki dang don bun tylli ki shnong ki bym pat don surok bad kane kadei namar ki paidbah ki thaw iala ki shnong sha Them Riat lane sha ki jaka lum ha kaba wat haka juk Technology kaba mynta, lah ban ong ba ka dang shem jingeh ban pynpoi surok.
Tang hapoh East Khasi Khasi Hills kaba dei ka District ba don ka Nongbah Shillong ka nongbah ka Jylla Meghalaya, ki don 2 tylli ki shnong kiba paw pyrthei namar ka jingbym pat don surok.
Ka shnong Rasong ka pawnam namar ka don harum jong ka jaka jngohkai pyrthei ba paw nam bha kata ka Laitlum katba ka shnong Nongpriang kaba don ha Sohra, ka jaka ba pawnam ha baroh kawei ka pyrthei, kala sdang paw mynta ka kynti namar ka jingjia ba sngewsih ha kaba 4 ngut ki briew kila khlad namar ka jingtwa khyndew.
Ka jingjia twa khyndew ha Nongpriang ka la sei pyrthei ruh ia ka jingeh bad ki jingjynjar kiba ki nongshong shnong ki kynduh ha ka jingim jong ki man la ka sngi khamtam haba iadei bad ka pang ka shitom lane ha ka leit ka wan sha iew sha hat.
Ban poi shapoh ka shnong Nongpriang kaba don ha ki bynta jong ka Riwar Sohra, donkam ban hiar bad kiew haduh kumba 7300 tylli ki maw kyndon bad kan shim por ym duna iaka 4 kynta ia ki briew ki bym ju mlien iaid kjat.
Haba kren halor ka jingeh ha ka pang ka shitom, u Sordar Shnong u Bah R Nongrum kumjuh u Assistant Secretary Shnong Bah B Mawkong ki la iathuh ba ki bunsien hi la hap ban shu kit da ka met haduh ban da poi surok bad kane ka la buh jingeh haduh katta katta khamtam haka por slap.
Kila iathuh baka shnong kam pat don Dispensary hynrei ki don ki ASHA bad Anganwadi kiba don ha shnong ki iarap ban ai dawai haba don ki jingpang jingshitom ba malu mala hynrei ia ki jingpang kiba la kham jur ki hap beit ban shu kit da ka met.
Haba iadei bad ka koit ka khiah, ki nong shong shnong ki ki pynpaw ruh ba kin kmen eh lada ka sorkar ka phaikhmat ban buh noh da ki kynja Dispensary ha ka shnong jong ki.
Haba kren pat halor ka rep ka riang, ki paidbah bad ki nongialam shnong kila iathuh ba mynshwa ka thain ka shnong ka pawnam bha ha ka thain kriah thain shang, nalor ba ki rep ki soh ki pai.
Kila iathuh ruh ban pynpoi pat ia ki mar rep sha lait u lum ki hap ban siew la kumno kumno T.300 haduh T.500 tyngka shi kit, kaba mut kaba bun hi la pynlut tang ha ka bai kit.
Watla ka don ka Ropeway hynrei kila iathuh ba kane ka Ropeway ka ai jingmyntoi, ban kit ban bah iaki mar rep hynrei sniew bok ba tang hadien artaiew bala pyntreikam, kala sniew noh bad haduh mynta, kane ka Ropeway ka shu kylla long ka tiar peit kai.
“Ngi kyntu jur ia ka sorkar ba kan pynshna biang ia ka Ropeway namar kane ka iarap haduh katta katta ha ka kit ka bah khamtam ia ki mar rep namar ngi la lait ban siew ia ka bai kit,” ki la ong.
