Shillong, Jyliew 01: U Myntri ka tnat Revenue and Disaster Management u Bah Kyrmen Shylla hynne ka sngi Saitjain, ula hiar hi da lade ban ai mynsiem ia ki Longiing jong ki briew ba khlad ha ka jingtwa khyndew hapoh ka shnong Nongpriang, East Khasi Hills.
Ia u Bah Kyrmen la synranlang da u MLA ka Sohra Bah Gavin Mylliem haka jingdon lang u Sordar bad Rangbah Shnong bad ki nong shong shnong ka thain.
Kumban shu kdew baka shnong Nongpriang, ka don ha them riat bah bad kadei ka shnong ka bym pat don surok bad ban poi sha kane ka shnong, donkam ban noh ia palat 7300 tylli ki maw kyndon (Steps).
Ban poi sha kane ka shnong u Myntri bad u MLA ha ryngkat ki nongshong shnong kila hap ban iaid ym duna iaka 3 kynta.
Kum shi bynta ban pyni baka Sorkar Jylla ka don ka jingsnewlem iaki 4 ngut kiba iap twa khyndew, u Myntri ka tnat Revenue and Disaster Management lem bad u MLA ka Sohra ki hiar hi da lade ban ai mynsiem iaka shnong bad haka juh ka por ban sam iaka song pisa shaki bahaing.
Haba kren ha kane ka sngi u Myntri ka tnat Revenue and Disaster Management u Bah Kyrmen ula ong “Watla ki paralok bad ki ophisar Sorkar kila pyntip ba ka long kaba eh ban poi sha kane ka Shnong hynrei kum ki nongmihkhmat, ki donkam ban ialam lynti daka ba leit hi dalade ban ai mynsiem bad ban sam pisa jingiarap shaki bahaing jong ki lanot”.
U Bah Kyrmen ula ong baka Sorkar Jylla lem bad ka tnat Revenue and Disaster Management ka sngewsih ban iohi ba kum kine ki jingjia ba sngewsih ki wan tap iaki paidbah nong shong shnong ka Jylla.
Ula ong baka Sorkar ka ialeh katba lah ban ai ki lad jingiada ban lad jingiarap iaki lanot kiba shah ktah haka jingwan lynshop ka mei mariang.
Naka liang u MLA ka Sohra constituency u Bah Gavin Mylliem ula ai khublei iaka Sorkar Jylla haka jingialam da u Myntri Rangbah u Conrad K Sangma bad u Myntri ka tnat Revenue and Disaster Management u Bah Kyrmen Shylla kiba la pynsted ban pyllait iaka song pisa shaki bahaing jong ki 4 ngut ki lanot twa khyndew.
U Bah Gavin ula ai khublei ruh iaki Pulit ka Sohra PS, ka kynhun SRT, SDRF bad iaka ophis SDO Sohra kiba la kloi ban poi sha shnong ban iarap haka por twa khyndew.
