Shillong, Jymmang 29: Ka Tnad Home Guards & Civil Defence (CD&HG) bad ka kynhun SDRF kila bunkam na ka jingkhie jong u Cyclone Remal ha ka jylla ha kaba katei ka kynhun kala leit ban iarap mardor ia kito kiba la shah ktah na ka jinglynshop jong ka bor mariang ha kylleng ka jylla Meghalaya.
Katkum ka kyrwoh na u Bah Paul H Shylla, Divisional Commandant of Home Guards, Shillong & u PRO jongka Directorate of Civil Defence & Home Guards Meghalaya, Shillong ula pyntip ba ki Home Guards & Civil Defence kila leit ban weng mardor ia ki dieng kiba la khyllem ha ka shnong Pamrakrai, East Jaintia Hills bad kila lah ban weng mardor ia une u dieng ban pynthikna ba kan ym don than ka jingjulor ia ka iing bad ia ka kali jong u Bah Welson Siangshai.
Kila leit ruh ban weng mardor ia u dieng uba la khyllem uba la ban ia ki sainar elektrik ha ka shnong Tpeppale khnang ba kan ym pynthud ia ka iaid ka ieng jong ki paidbah bad kila iatreilang ruh bad ka Meghalaya Energy Corporation Limited (MeECL) bad ka Forest Department ban pyndep ia katei ka kam khnang ba kan ym don ka jingthud ia ka jngsam ia ka bording elektrik.
Ka SDRF kala shimkhia mardor ha kylleng ki jaka ban weng ia ki dieng kiba la khyllem halor jong ki sainar elektrik ha ka surok kaban leit sha College of Community Science, Central Agricultural University, Sangsanggre, Tura, ban weng mardor ia ki dieng kiba la khyllem halor jong ki post bad sainar elektrik ha Matchakolgre, Tura bad kila leh ia katei ka kam ha ka lynti kaba shngain.
U PRO ula pyntip ruh ba kila leit ruh ban ot bad ban pynkhyllem noh ia uwei u dieng uba la jan khyllem bad la leh ia katei khnang ba kan ym buh ha ka jingma ia ki iing kiba don marjan bad ia ki nongshong shnong jongka shnong Babupara, Tura.
Ka SDRF mynta ka dang iaid shakhmat ha kaban weng noh ia u dieng uba la khyllem ha Tura Civil Hospital bad kila trei biang biang ia ka kam ban pynthikna ia ka jingshngain jong ki paidbah bad ia kiba don hapoh jong ka hospital.
U Bah Paul Shylla ula pyntip ba ka Civil Defence & Home Guards (CD&HG) ryngkat bad ka State Disaster Response Force (SDRF) kila bteng ban trei shitrhem bad ban leit mardor ban pyndep ia ka kamram ka jongki haba don kino kino ki jingjia bad ban peit na ka bynta ka bha ka miat bad ka jingshngain jong ki nongshong shnong.
