Nongpoh, Jymmang 17 : Ka Dorbar Shnong Erpakon kala kyntait ban leit sha ka jingialang wanrah jingsuk (peace meeting) bala khot da u Deputy Commissioner halor ka rai jong ka Shnong ban beh krad lut ia baroh ki bar jylla kiba sahwai bad trei bylla hapoh ka Shnong kynthup ia ka dhaba RN Sharma Hotel.
Ka Dorbar Shnong kala shim ia kane ka rai ha ka jingialang jong ka Dorbar bala iashimbynta da ki nongshongshnong, kaba long hynne hi ka step sngi Nyngkong.
Lah ban kdew ba u Deputy Commissioner ka Ri-Bhoi Arpit Upadhyaya ula khot ia ka jingialang wanrah jingsuk hapdeng ka Dorbar Shnong Erpakon bad ka RN Sharma Hotel namar ka rai jong ka shnong ban phah mih noh ia kane ka dukan hapoh ka shibnai.
U DC ula khot ia kane ka jingialang ha ka por 12 baje ha Nongpoh.
Kane ka rai ban nym leit jingialang jong ka Dorbar Shnong kala mih halor ka jingshah pyniap uwei u rangbah na Shnong Bah Kyrmen Lyngdoh Nonglait, ha u nongbylla bar jylla uba trei ha ka dhaba RN Sharma, kaba la jia myn ha ka miet 11 tarik Jymmang.
Dang ha ka 23 tarik Jymmang, ka Ophis u DC kala lum ia ka jingialang wanrah jingsuk hynrei kane ka jingialang ka khlem poi shano shano ruh namar ka jingpyneh jong ka Dorbar Shnong Erpakon ban kynran dien noh na ka rai beh bar jylla.
Ka Dorbar Shnong bala ialam da u Rangbah Shnong M Thongni bad Secretary Lambor Kharshilot, kila lum ia ki nongshong shnong hynne ka step ban iakren halor ka jingkhot u Deputy Commissioner. Hynrei ka jingialang kala iarai lang ban nym leit iashimbynta satia ha kane ka jingialang.
U Secretary Shnong bah Lambor Kharshilot ula pyntip ba ia kane ka rai jongka Dorbar Shnong yn sa phah sha ka Additional Deputy Commissioner (ADC) kum ka jingpyntip.
