Shillong, Jymmang 15: U Myntri ka tnad jngohkai u Bah Paul Lyngdoh kum u kongsan bad u Commissioner & Secretary ka Tnad Arts and Culture Bah FR Kharkongor hynne ka sngi Balang, kila pyllait paidbah ia ka Pansngiat jong ka jingiakob thei bhabriew kaba la tip kum ka Miss Universe Meghalaya, kaba la long ha Vivanta, Khyndailad.
Ha kane ka jingialang la iadonlang u Amjad Khan u Director of Operations & Marketing jongka Miss Universe India, ka Arshina Sumbul kaba dei ka Miss Grand International India 2023 bad ka Sophiya Singh kaba dei ka Miss Asia Pacific India 2024 bad ia kane ka jingialang la pyniaid da ka Miss Meghalaya Organisation.
La sdang ia katei ka jingialang da kaba pyllait ia ka shap da u Bah FR Kharkongor katba u Bah Paul Lyngdoh ula pyllait paidbah iaka Pansngiat kaban pynkup iaka thei bhabriew kaba rah ia ka nam lahduh ha ktei ka jingiakob.
U Bah FR Kharkongnor ula ong, ba ka jylla ka iengskhem ha ka jingkular ban kyntiew ia ka bor da kaba saindur iaka sap ka phong jong ki samla ha ki liang bapher bapher.
U Bah Paul Lyngdoh, ula pynpaw ia ki sienjam kiba ka sorkar kala shim ban kyrshan bad ban kyntiew ia ki sap ka phong jong ki samla ha ka jylla khamtam ha kaba iadei bad ka rwai, ka tem ka put bad kiwei kiwei bad ula pynpaw iaka jingskhem jingmut ba ki riam tynrai kiba la pynmih na ka jylla Meghalaya kin ioh iaka jingithuh hapoh ka ri bad ha kylleng ki ri.
Ula kyntu ia ki samla ba kidei ban mihshakhmat ban pyni iaka jingtbit tynrai ka jongki ha ka liang ka Arts bad kiwei kiwei.
U Bah Dominic Savio ula shah thung kum u State Director jong ka Meghalaya da ka Miss Meghalaya Organisation.
U Amjad Khan ula ong ba kane ka jingsdang kan long kum ka rynsan na ka bynta ki thei samla kiba tbit ba kin pyni iala ka sap ka phong ka jongki naka jylla kaba ki shong ki sah hynrei kham mynshwa ki nongiashimbynta ki hap ban leit sha kiwei pat ki jylla naka bynta ban iakhun ia ka Audition watla kam shym la don kano kano ka jingkular ba kin shah jied kaba la kylla long ruh kum ka jingpynlutkai ia ka por bad ia ka bor hynrei mynta kila ioh ia ka lad ban iakhun hi hala ka jong ka jylla.
