Shillong, Nailar 8 : U MLA ka Jowai, u Ma Wailadmiki Shylla hynne ka sngi u la noh synniang 50 hajar tyngka sha ka kynhun Under – 14 jong ka Mihmyntdu RC EVE Secondary School, kaba la ioh ban khur ia ka nam lahduh jong ka State Level Subroto Mukherjee Cup 2022, bad ioh pat mynta ban leit mihkhmat iaka Jylla ha nongbah Delhi kaban sdang naduh ka 06tarik u Nailur.
Ha katei ka jingialang pynkup burom ba la pynlong da ka skul la donlang ruh u MDC ka North jowai u Brightstar Chyrmang, JHADC (Nominate) MDC Ma Otomewot Lamin, u Rev.Fr.H. Lamare Parish Priest Jowai, u Rev. L. Paswet Assistant Parish Priest Jowai, u Rev.F.Dkhar nongpeit ia ka Jowai Diocese, u District Sport Officer, Ma Khroobok Passah nalor kiwei kiwei.
U DSO ha ka jingkren ula ong ba u khlem poi pyrkhat satia ba ka skul na katei ka distrik kan ioh ban mihkhmat ia ka jylla ha ka lympungbah kaba heh kaban long ha Delhi bad kumta u la ai ka jingiaroh ia kitei ki heprit shynrang ba kin lah ban ialehkai bha khnang ba kin ioh ban wanrah biang ia ka burom ia ka distrik bad ia ka jylla hi baroh kawei.
U MLA pat u la ong ba bunsien ki skul kiba leit ban shim bynta ha kitei ki lympung ki dei ki skul kiba la pawnam bad ki skul kiba ju leit tang kiba don ba em bad bun na kine ki skul ki dei na ki skul ba don ha sor. “Hynrei kane ka skul ym dei ba ka don ha nongkyndong hynrei bun na ki khynnah skl ruh ki dei na ki longiing kiba duk ba kyrduh.”
Kumta u la kyntu ia kitei ki khynnah skul ba kim dei satia ban pynlehnohei ia ka sap ba ki don hynrei ban pynjanai shuh shuh ia ki. Kiwei pat kiba kren ha katei ka sngi ki kynthup naduh ka Kong Tina Lakiang Head teacher Cum Secretary nalor kiwei kiwei.
