Shillong, Jymmang 09: Ka BJP Meghalaya ha ka Sngi Palei kala ther ia u nongialam ka seng Congress u Sam Pitroda halor ka jingkynthoh palat pud pyrshah ia ki paidbah jong ka thaiñ shatei lammihngi jong ka ri.
Ha ka kyrwoh na u Nongaiktien ka BJP u Bah M Kharkrang ula ong, “Ka long kaba kyndit, kaba lehraiñ ba ka jingkren beiñ jong u Sam Pitroda kala pynmong ia ka jingsngew jong man ki nong India bad dei ban pynrem jur tyngeh ia kane. Ngi kiba shong basah ha ka thaiñ Shatei Lammihngi ngi lap ba ka long kaei kaei kaba bakla bad kaba sngew jlep ba don ki briew kiba bat ia ka kyrdan ki lah leit shaduh u pud ban ong ba ka dur ka dar ka jong ngi ka long kum ki China. Nga kwah ban kren da kaba shai kdar ia u Pitroda, ba ngi baroh ngi n peit ha ka iit bad peit ia ka jingphalang ia ka dur kum kita ki nong India kiba sngewsarong, ia kaba u briew uba ju shong ha kawei pat ka ri, u briew uba la sdang ban isih ia la ka ri, yn ym lah ban sngewthuh”
“Haba ngi kynmaw iaka rukom pyrkhat jong une u briew uba sniew, udei u briew u bym don jingiadei eiei shuh bad ka tynrai lajong, udei u nonghikai bad u nongaibuit jong u Rahul Gandhi. Kane hi ka pyni ia ka jingshet kylla bad ka jingpeitkhmat jong ka seng Congress ia baroh ki nong India. Balei, uwei un hap ban shim ia ki jingai jingmut na uwei pat uba la long u bar ri u bym don ka jingburom ia ki nong India bad ia ka dor jong ki nong India? Ula buh jingkylli.
Ula ong ba ka seng Congress kadei ban kynmaw ba ki sngi ba pyn iapait iapra ;yngba ka politik, kaba la lamkhmat da ka kynhun kaba sngewmeng bad sngewsarong kala kut noh bad kane ka seng mynta kadei ban panmap noh mardor na baroh ki nong India.
“Ka BJP Meghalaya ka don ia ka jingsngewkhia bad ka shim ba baroh kawei ka seng Congress kadei ban shim ia ka jingkitkhlieh halor katei ka jingkren beiñ bad ki nongialam kim lah ban riehtngen halor katei ka jingkynthoh da kaba shu ong ba kim lah ban pdiang ia ka jingkren kynthoh u Sam Pitroda” ong u Bah Kharkrang.
