Shillong, Jymmang 09: Ki Association ba khaii jhur na Meghalaya sha kiwei pat ki jylla, kila kyntu ia u Symbud Myntri Rangbah ka Jylla u Bah Prestone Tynsong ba un tuklar lang ha ka ban pyllait iaki kali kit mar rep naka jingiaid lyngba ki Weightbridge bad ka jingshah khrong pisa ha ki Weightbridge.
Ia kane la pynsngew daki Association ba kynthup ia ka Meghalaya Trader Fresh Vegetables and Ginger Association, ka Association Khasi Jaintia Food Vegetables Supplier Association, Shilliang Um Trader Farmers Association, ka lewduh Khasi Pnar Association bad ka Fresh Green Ginger Association Ri-bhoi, ha ka jingiakynduh ia u Symbud Myntri Rangbah hynne ka sngi Palei.
Haba kren sha ki lad pathai khubor, u President Meghalaya Trader Fresh Vegetables and Ginger Association Bah Bristar Mawthoh ula iathuh ba ki Association kila pynsngew sha u Symbud Myntri Rangbah halor ka jingeh ba ki kali kit jhur ki kynduh haba ki mih na Meghalaya ban leit shalan iaki mar rep sha kiwei pat ka Jylla ka thain Shathei Lammihngi.
“Ngi la kyntu ia u Symbud Myntri Rangbah ban pyllait iaka jingpynrung jubor ia ki kali kit mar rep ha ki Weight Bridge bad ban thew ia ki mar rep ha Umling, Khlieh Tyrshi, Ratachera bad bthah iaki bor ba khmih iaki Weight Bridge ba kin nym shim pisa na ki kali kit mar rep” ong u Bah Bristar.
U Bah Bristar ula iathuh ba ka don ka jingshah khrong pisa ha ki gate kiba don ha shi lynter ki surok bad kane ka la pynthud ia ka jingiaid beit ki kali kit mar rep kiba don ia ka Delivery Challan jong ka Association naka bynta ban pynpoi mar rep sha Upper/Lower Assam, Tripura, Mizoram, West Bangal. Manipur, Nagaland, Darjelling bad sha kiwei kiwei ki jylla.
“Kane ka jingshah pynsangeh ki kali kit mar rep haki Weight Bridge, ka khanglad iaki kali ban poi shaki iew ha ka por ba biang bad nalor ka lynti ka ba jngai namar bun ki marrep ki sniew noh ha ki kali” ula ong.
Nalor kane u Bah Bristar ula iathuh ba ki Association kila kyntu ia u Symbud Myntri Rangbah ban leh eiei halor ka jingsniew palat pud ka surok ha ki thain East Jaintia District naduh Lumshnong Sonapur, Kuliang bad ha ki thain Narpuh.
“Ka jingsniew ki surok ka la buh jingeh ka ba khraw bha ha ka ban pynpoi ia ki marrep sha ka jylla Assam, Tripura, Mizoram bad kiwei kiwei ki Jylla ba dei iaid na kane ka surok namar ki kali kim lah shuh ban beh iaka por long iew bad kane ka pynlong iaki mar rep ban pyut ha shiteng lynti” ula ong.
Ki Association kila kyrpad ruh na u Symbud Myntri Rangbah ban nym bat ‘No Entry’ ia ki kali ki ba wan kit ia ki Marrep bad ki ba kit ia ki marrep na Iewduh, Umphynai Laitkor, Bhoi Rymbong bad Lawmei.
