Shillong , Jymmang 09: Ka Federation of Khasi Jaintia and Garo People’s (FKJGP), Khasi Students Union (KSU) Upper Shillong Circle bad ka Synjuk ki Nongsynshar Shnong ka Upper Shillong, kila pyrshah jur ban ai jaka ia u Bar Jylla haduh 13500 Sq ft ba un tei ia ka Petrol Pump ha Upper Shillong.
U Bah Kitboklang Nongphlang, PresidentbFKJGP Upper Shillong, ula ong ba ki sengbhalang bad ki nongsynshar shnong kim pyrshah ban shna ia ka Flyover ne ban pynthud ia ka jingshna ia ka Surok Four Lane, hynrei ki pyrshah jur pat ia ka sorkar jylla ba kan ai jaka ia u bar jylla ban tei ia ka Petrol Pump ha ka jaka sorkar kaba don ha Upper Shillong.
Ula ong, haba ka sorkar ka shim jaka na ki trai jylla ka shu siew tang ka bai jaka bad ki hap wad jaka hi shawei.
“Ka sorkar kala ai jaka kyrpang haduh 13500 Sq ft ia u bar jylla ban tei ia ka petrol pump hynrei ka sorkar kala shim tang 2000-2500 Sq ft ka jaka ha Anjalee Petrol Pump kaba long haduh 3 ne 4 shah ka jaka na ka sorkar jylla” ong u Bah Kitboklang Nongphlang.
“Balei ka sorkar ka hap ban ai ka jaka kaba kyrpang ia une u bar jylla bad ba pynleh khun khatduh beit ia ki bar jylla katba ia ki trai jylla kam ju ai satia ia kum kine ki jait jingtyrwa kaba kyrpang” ong u Bah Kitboklang.
Ula iathuh ha ki snem kiba la leit rih, kila mih shakhmat ban pyrshah ia ka sorkar jylla ba kan ai jaka ia ki shipai hynrei namar ka jingpyrshah ki sengbhalang bad ka Synjuk ki Nongsynshar Shnong, ka sorkar kam shym la ai jaka shuh.
U Bah Kitboklang ula iathuh ruh ba ka Dorbar Shnong Sanmer kala ai ia ka NOC ban pynkynriah ia katei ka Petrol Pump jong ka M/S Ashok Auto Service.
Ula ong ba watla ki sengbhalang bad ki nongialam shnong kila pyrshah naduh ka 3 tarik u Nailar 2023 hynrei ka sorkar kam shim la khot iakren eiei ia ka seng ne ia ki nongialam shnong hynrei kila iaid shakhmat ban ai beit ia ka jaka.
“Ngi maham jur ia ka sorkar ba lada ka ai jaka kum kine ia ki bar jylla haka jaka Sorkar, kan plie lad ia kiwei pat ki bar jylla ba kin ioh ia ki jaka sorkar nangne shakhmat” ong u Bah Kitboklang.
Ula iathuh ruh ka Synjuk ki Nongsynshar Shnong ha u snem ba la dep kala ai da ka dorkhas ha u Myntri Rangbah ka jylla u Conrad K Sangma ba pyrshah ban ai jaka ia u Bar Jylla ha ka jaka sorkar kaba don ha Upper Shillong.
