Shillong, Jymmang 03: Ka Sorkar Jylla kala weng noh iaka hukum beain bala pynmih daka ophis u Under-Secretary ka tnat Social Welfare kaba kam ba shah ban ai syrnod Scheduled Tribe (ST) iaki briew ba shim jait la ka dei na u kpa ne kmie lane ka jingshim jait jong u kurim da ka kynthei ka bym dei ka Khasi.
Ia kane ka rai bala weng noh iaka hukum bala pynmih haka 21 tarik Naitung 2020 la pynbna da u Myntri ka tnat Social Welfare u Bah Paul Lyngdoh.
Haba kren sha ki lad pathai khubor u Bah Paul ula iathuh ba haka 28 tarik Rymphang, ula lum ia ka jingialang bad ka Executive Member bad Ophisar ka Khasi Hills Autonomous District Council (KHADC) haka jingdon lang ki nongialam ka Hynniewtrep Youth Council (HYC) haba iadei bad ka hukum bala pynmih naka Ophis u Under-Secretary ka Tnad Social Welfare sha ki Deputy Commissioners ka East Khasi Hills bad West Khasi Hills ha u snem 2020.
Ka shithi ka kdew “Ba ka Lineage Act, 1997 kam khang ban ioh syrnod ST sha ki briew ba apply ban shim jait kpa, kmie lane ki kynthei bym Khasi kiba shim jait jong u Kurim uba dei u Khasi”.
U Bah Paul ula ong, ym don Ophisar jong ka Sorkar ba lah ban pynmih kum kine ki hukum ba iatyngkhuh bad ka Act bala mynjur daka KHADC.
“Haka jingiakren, la sngewthuh shai ba haba iadei bad ka Lineage Act 1997, ka dei hi kaba la mynjur daka KHADC bad kaba la ioh muhor na u Lat ka Jylla, kaba mut ia kane ka Bill la dep ban iatai sani daka tnat DCA bad kala long ain. Namar kata ym don Ophisar jong ka Sorkar Jylla u ban don ka hok ban pynmih kano kano hukum ne OM ka ban iatyngkhuh bad ka ain kaba la don lypa wat hashuwa ban pynmih iaka hukum. Namar kata ngi la lap ba hap pyndam noh bad weng noh ia kane ka hukum” ula ong.
U Paul ula ong ba ki jingbthah ki don ruh haba iadei bad ka jingai syrnod SC/ST lyngba ka Office Memorandum (OM) haka 19 tarik Lber 2014 shaki Deputy Commissioners ka East Khasi Hills bad West Khasi Hills Districts.
“Ka long kaba shisha ba kane ka hukum kala iaid ha baroh kawei ka Jylla hynrei kaei kaba jah na kane ka hukum ka long ba ki khlem khmih bniah ba ka don ka Tribe Certificate bala ai da ka KHADC haba iadei bad ka syrond Khasi tribe Certificate kaba long kaba donkam tam naka bynta kito kiba appli ST Certificate, ba ki dei ban ioh shwa ka Khasi Tribe Certificate naka KHADC,” ula ong.
“La rai ruh ban pynkylla iaka OM daka ba bsuh iaka kyntien “Ka Syrnod Tribe Certificate naki bor ba dei khmih ha ki jaka ba hap hapoh ka KHADC” kum kiwei ki kyndon ban ai syrnod” la ong u Bah Paul haba iathuh ba ula ai muhor iaka File ban weng iaka hukum.
Haba kylli hato yn pynshitom ne em ia Ophisar ba pynmih iaka hukum beain, u Bah Paul ula ong “Ia ka ba mynta hi ngi shu pynbeit iaka jingsngewthuh bakla”
Katkum ka jingong u Bah Paul, ka jingai syrnod ST kaba long beain, yn sa khein iap noh.
 iaki briew ba shim jait la ka dei na u kpa ne kmie lane ka jingshim jait jong u kurim da ka kynthei ka bym dei ka Khasi.){kind=link}