Shillong, Jymmang 01: Ka Shillong Lajong FC kala pynrem ia ka Nangkiew Irat da 2-1 ha ka jingiakhun Shillong Premier League 2023 kaba long ha SSA Stadium, First Ground, Polo, ha ka sngi Balang.
Naduh ba sdang hi ka jingiakhun, kine baroh artylli ki kynhun kila ialehkai bha ha kaba kila ioh ia ki kabu tangba kim shim la lah ban thep kol.
Ha ka minit kaba 25, u Mebannangkiew Thabah ula ioh thep ia ka kol na ka bynta ka Lajong bad ha ka kylla miet u Samchaphrang Lato ula thep ia ka kol ka ba-ar ia ka Lajong ha ka minit kaba 69.
U Prashant Chettri ula thep ia ka kol ha ka 84 minit na ka bynta ka Nangkiew Irat.
Kane ka jingjop jong ka Lajong kala pynlong ia ka ban don ha ka kyrdan ka Ba-ar da kaba tam syndon 2 point ia ka Mawlai SC kaba dang don sa kawei ka jingiakhun.
Ka Nangkiew Irat bad ka Nongthymmai SC kila kamai tang mar 3 point bad ki don ha ka kyrdan kaba khatduh jong ka SPL.
Ka Langsning FC kan iakhun pyrshah ia ka Ryntih SC ha ka sngi Thohdieng katba ka Mawlai kan iakhun pyrshah ia ka Nangkiew Irat ha ka sngi Saitjain bad kitei ki jingiakhun kin sdang ha ka por 3:15 mynsngi.
