Imphal, Jymmang 01 : Ki dkhot ka seng longkmie ‘Meira Paibis’ ha ka sngi Ba-ar, kala dawa ban pyllait mardor ia ki 11 ngut ki riew ngeit atiar ba phong uniform bad pakhang lynti ia ki shipai ba kin kit noh ia ki tiar siat bad ki kuli bala kurup na kine ki briew ha Bishnapur District.
Kine ki riewkiengatiar ki dei ki ‘Village Volunteers’ ( ki nongshongshnong ba kiengatiar ban iada iala ka shnong) jong kawei ka Jaidbynriew kiba la kieng tiar siat bad kuli bala kurup da ki shipai.
Ki Heh Sorkar kila iathuh ba ha ka por iaid pahara ha ka thain Kumbi kaba hap hapoh ka Bishnapur District, ki shipai jong ka Mahar Regiment kila ioh bat ia artylli ki kali SUV bad kem ia 11 ngut ki Village Vonlunteers kiba don ha kine ki kali.
Haba ki shipai kila knieh noh ia ki tiar siat bad ki kuli bad ialam ia ki sha along, ka kynhun ki Longkmie jong ka ‘Meira Paibis’, kiba dei ki nongpeitngor jong ka jaidbynriew Meitei, kila ialum paidbah ha kane ka jaka bad bthah ia ki shipai ba kin aiti noh ia ki tiar siat bad ban pyllait mardor ia ki 11 ngut kiba shah kem.
Kine ki Longkmie kila kam ba kine ki tiar siar bad ki kuli ki dei jong ki Village Volunteer, ia kaba kat kum ka jingong jong ki, ki dei ki nongiada ia ki shnong ki thaw na ka jinghiar thma ki kynhun kaikhlaw jong kiwei pat ki Jaidbynriew.
Da ki spah ngut ki dkhot ka Meira Paibis kila pakhang ia ka surok bad khang ia ki shipai ba kin mih na kane ka jaka, kaba la pynbor ia ki shipai ban siat katto katne kuli sha suin ban pynpra ia u paidbah.
Hadien kane, ka kynhun ki Pulit ka Manipur bala ialam da ki heh Pulit kila leit poi ha kane ka jaka bad hadien ka jingiakren kaba sani bad kine ki Longkmie, ia kine ki tiar siat bad ki kuli la shimti noh da ki Pulit.
