Shillong, Iaiong 30: U Jr Emiliano Martinez ka Jylla, u heprit Samborlang Rynjah, ula ioh pdiang ia ka jingtyrwa scholarship na ka Miverva Punjab Football Academy, kaba la dei teng ia ka kynhun I-League bad ka Football Academy kaba paw bha hapoh ka Ri.
Une u Heprit ba dang 6 snem ka rta na Mawryngkneng, ula pyniap biej ia ki riewieid phutbol ha satlak ka pyrthei na ka sap ap kol kaba u don, kaba la ring video bad pynsaphriang lyngba ki kor ka social media.
Ia kane ka jingtyrwa ka Minerva Punjab Football Academy la pyntip da ka Kmie une u Heprit Kong Kyntiewlang Rynjah haba iakren bad ka Shlem hynne ka sngi Ba-ar.
Ila pyntip ba ka Club kala tyrwa scholarship ia u heprit Samborlang ha kaba kan shim ia ka jingkitkhlieh ban pynlut hi nadong hadong na ka bynta u heprit Sanborlang ba kynthup naduh ka jingleit skul bad ki jinglut jingsep ha ki jingialehkai phutbol.
Ka Club kan ai ia ki jinghikai bad coaching ia u heprit Samborlang ba un nang lah pynjanai ia ka sap ap kol.
Ka Minerva Academy Football Academy ka dei ka Academy kaba la ai jinghikai ia ki jingialehkai bapher bapher ha Chandigarh, Punjab. Ia kane ka Academy la long trai da u riew ieid phutbol bad u hehspah Ranjit Bajaj.
Kum ban shu pynkynmaw, ia kane ka sap ap kol jong u herit Samborlang la pynsaphriang shuh shuh da u nongapkol ba pawnam ka Argentina u Emiliano Martinez uba ioh rah ia ka Golden Gloves ha ka Worldcup 2022, uba la pynphriang ia ka lynga ka Instagram jong u.
Wat ka Indian Super League (ISL) ruh kala pynphriang ia ka video jong une u heprit ha ka social media account jong ka. Kane kala pynlong ia ki Footbal Club jong ka Ri ban kwah ia u Samborlang ban long shibynta jong ka kynhun ialehkai jong ki, lehse ha kawei ka sngi un sa long u spah bah u ban sa wanrah ia ka nam ia ka Ri.
