Kyndit u DyCM ia ka RTI ka SMB|pynshna da ki quarter ia ki Iing jong ki Nongtrei Sorkar
Shillong, Iaiong 29 : Ka seng Hynniewtrep Youth Council (HYC) kala dawa ia ka Sorkar Jylla ban shu kyn dang ia ki 148 tylli ki Longiing na Them Metor, Them Iew Mawlong halor ka nongrim ba kine ki dei kiba shu shong be-ain bad kim dei satia ki longiing jong ki nongtrei Sorkar.
Kane ka jingdawa kala mih hadien ba ka HYC kala ioh jingkhein lyngba ka RTI ba napdeng ki 342 tylli ki Longiing kiba kam ha ka Affidavit bala ai sha ka Iingkashari Meghalaya High Court na ka bynta ban pynkynriah noh ia ki sha kiwei ki jaka, tang 194 tylli ki dei ki Longiing jong ki nongtrei Sorkar katba 148 tylli ki dei kiba shu shong beain.
Ka RTI bala iohpdiang na ka Ophis ka SMB kala pynlong ia ka HYC ban phah tuklar mardor ha u Symbud Myntri Rangbah ba khmih ia ka Tnad Home (Police) bah Prestone Tynsong, ba un phah kyndang mardor ia ki 148 tylli ki Iing beain na Them Iew Mawlong namar ka jingkylli ban kynthup ia ki ha ka jingpynkynriah sha kiwei ki jaka kam mih satia.
Kane kala mih ruh tang da ki sngi hashuwa ka jingiakynduh biang hapdeng ka Sorkar Jylla bad ka Harijan Panchayat Committee (HPC), ka ban long la 7 tarik Jymmang, ban shim ia ka rai ba khatduh halor ka kam ba iadei bad ka jingpynkynriah ia ki 342 tylli ki Longiing sha ka jaka ka Sorkar bah eh 3.45 acre hapoh ka European ward ka Shillong.
Haba iakren bad ki nongthoh khubor hadien ka jingiakynduh ia u Symbud Myntri Rangbah, u President ka HYC Bah Roykupar Synrem ula ong ba u Symbud Myntri Rangbah ula pynpaw ia ka jingkyndit bad jinglyngngoh halor ki jingtip bala ai lyngba ka RTI bad ula kular ba un sa pan jingpynshai na ka SMB hashuwa ba ka Sorkar kan shim ia ka rai ba khatduh halor kane ka kam.
Ula ong ba kat kum ka jubab RTI na ka Ophis ka SMB, napdeng ki 342 tylli ki Longiing kiba shong ba sah ha Them Metor, Them Iew Mawlong, ki don haduh 148 iing ki bym dei satia ki nongtrei ka SMB lane jong kiwei pat ki Tnad Sorkar lait noh tang 194 tylli ki Longiing kiba dei jong ki nongtrei ka SMB bad jong kiwei ki Tnad Sorkar.
“La pyntip ruh sha ngi ba bun na ki Nongtrei ka SMB ki dei kiba shu trei part-time lane trei bylla sngi. Kiba bun na ki, ki dei kiba la shu thung khlem kano kano ka jingpynbna laitkam bad don ruh napdeng ki Nongtrei kiba la khlad hynrei ki bahaiing hasem ki dei kiba sah ha katei ka jaka” ula ong.
“Haba nyngkong, ngi ban biang ia ka jingsngew jong ngi kat kum bala pyntip sha phi kham shuwa ba ki 194 tylli ki Longiing bas ah ha Them Iew Mawlong, kaba ki bahaiing jong ki dei ki ki nongtrei ka SMB ne kiwei ki Tnad ki lah ban ioh ia ki Quarter ka Sorkar bad ki lah ban sah ha kitei ki quarter katba ki dang shakri kum ki nongtrei jong ka Sorkar Jylla bad lada ym don kum ki quarter, kajuh ka ain kaba treikam sha kiwei pat ki nongtrei Sorkar ka dei ban treikam ia kine ki briew kata ban ai baiwai iing bad ym dei ban leh kyrpang ia ki/ne ai kyrpang ia ki” ula ong haba bynrap “Lad aka Sorkar ka rai ban ai jaka ei bad ka Iing ba pynshna ei sha kine ki briew, ngi sngew ba baroh ki nongtrei Sorkar kin sa dawa lem kumjuh hadien habud bad kane kan sa long ka jingkit kaba khia ia ka Sorkar Jylla bad ia ki paidbah ka Meghalaya kiba siew bad synniang sha ka pla iarong ka Sorkar”.
Ula ong, ka ba-ar, nalor ki nongtrei ka SMB bad kiwei ki Tnad Sorkar, kiwei pat ki briew ba sah ha Them Metor kata ki 148 tylli ki Longiing ki bym dei kiba trei ha ka Sorkar Meghalaya, kim don satia ia ka hok ban buh ia kane ka jingdawa/jaka sah na ka Sorkar.
“Kumta ka jingkylli ban pynkynriah ia kine ki briew kam mih satia, klet noh ia ka jingai jaka ei bad iing ba pynshna ei. Ki dei ban shah kyndang na ka thain kat kum ki kyndon ka ain” ong u President ka HYC haba bynrap “Kano kano ka rai ba bakla jong ka Sorkar halor kane ka bynta kan dei ka nuksa hadien habud ha kaba ki nongshongshnong ki bym don jaka jongka Jylla, kin sa sdang ban dakhol ia ka jaka Sorkar”.
U Bah Roykupar ula ong ba kat kum ka jubab RTI la shem ba bun na kine ki nongtrei ka SMB ki dei kiba la thung khlem da iaid kat kum ki kyndon thungkam kata khlem da pynmih ia ka jingpynbna laitkam. Kiba bun ki samla ka Jaidbynriew Hynniewtrep ki lah ban trei ia ki kam kiba kine ki briew ki trei mynta.
“Namar kata, ngi dawa ia ka Sorkar Jylla ba kan ai jaka sah tang ia ki 194 tylli ki Longiing kiba dei jong ki nongtrei ka Sorkar Jylla” ula ong bad bynrap “Ngi dawa ba ym dei ban ai jingmyntoi ia ki 148 tylli ki Longiing ki bym dei ki nongtrei Sorkar hynrei ban leh eiei pyrshah ia ki kat kum ki kyndon jong ka ain ban kyndang”.
