Imphal, Iaiong 22 : Hapdeng ka jingpahara kaba khlain, ka jingiathep vote biang ha ki 11 tylli ki Polling Station ka Inner Manipur Parliamentary constituency kala iaid shaid shaid hynne ka sngi Nyngkong.
Ka jingiathep vote kala iaid suk bad iaid beit iaid ryntih kat haduh mynta bad haduh 38% ki nongthep vote kila dep ban thep ia ki vote jong ki kat haduh ka por 11 baje mynstep.
Haduh 8500 ngut ki nongthep vote kila ioh ia ka hok ban thep biang biang ia kaba la hukum da ka Election Commission namar ka jingmih ka jingther kuli, jingbyrngem byrsit bad jingpynpra ia ki EVM nalor ka jingkurup ia ki Polling Booth ha kine ki Polling Station, ha ka sngi thep vote ba 19 tarik Iaiong.
Kane ka jingthep vote biang ha kine ki 11 tylli ki Polling station kala sdang naduh ka por 7 baje mynstep bad kan iai bteng haduh ka por 5 baje janmiet.
Ki ECI ha ka sngi saitjain kala khein iap ia ka jingiathep vote ba 19 tarik Iaiong ha kine ki 11 tylli ki Polling Station bad hukum ban pynlong thymmai biang ia ka jingthep vote.
Hynniew tylli na kine ki Polling Station ki don ha Imphal East District bad 4 tylli ha Imphal West District.
