Nongstoiñ, Iaiong 17: Ka KSU Rambrai Circle ha ryngkat ka KSU West Khasi Hills District Unit ha ka 16 tarik Ïaiong 2024, ka la noh synñiang da ki marbam sha ki 20 tylli ki longïing na ki 5 tylli ki shnong kiba hap hapoh ka Rambrai Circle, kiba shah ktah ha ka eriong.
Kine ki Longiing ki dei na ka shnong Synnia, ka shnong Mawdoh, shnong Nongthymmai, ka shnong Rangesohiong bad ka shnong Mawlasaw.
Kine ki longiing ki dei kiba la shah ktah ha ka eriong ka bala rat naphang ïa ki ïing ki sem jong ki ha ka 31 tarik Lber 2024.
Ka KSU haba ka ïohi ïa ki paradoh parasnam kiba shah ktah ha ki bor mariang, ka ju kner ïa ka jingleh isynei kum ka dak ka jingiadon ryngkat lem ha ki jingeh ba ki para doh para snam ki mad.
