Shillong, Iaiong 17 : U Nongialam ka National People’s Party (NPP) bad MDC ka KHADC Bah Bajop Pyngrope, ula bthah ia ki Nongkyrshan ka Voice of the People Party (VPP) ba kin peh shuwa da u ‘Prah’ ia ka kynnoh bamsap u Bah Ardent M Basaiawmoit shuwa ban peh ia kiwei.
“Ia ki Nongkyrshan ka Prah kiba ong ka VPP kan peh ia ka bamsap, ka kyrwoh nga phah sha ki, peh shuwa ia ka bamsap jong u Bah Ardent” ong u Bah Bajop ha ka rynsan ialap elekshon ban pan jingkyrshan ia ka kyrtong ka NPP Kong Ampareen Lyngdoh, ba long mynta ha Madan Malki.
Une u MDC ka KHADC ula kynthoh ia kane halor ka jingkynnoh donkti u President ka VPP bad MLA ka Nongkrem Bah Ardent M Basaiawmoit ha ka jyrsieh thied jaka ka KHADC ha Mawkyrwat kaba kot palat T. 35 lak mynba u dang long u Chief Executive Member (CEM) ka Council.
Une u MDC ula sei madan ruh ia ka sale deed ba iadei bad ka jingiadie iathied ia ka jaka ha Mawkyrwat ha u snem 2014, kaba ka Council haduh mynta kam shym la ioh satia ban kam trai namar ka jingpyrshah jong u Trai jaka, uba ai dawa ba u khlem pat ioh pdiang satia ia ka pisa.
Ula kynnoh ruh ba une u trai jaka ha Mawkyrwat u dei u paralok ba iaieid iajan bha bad u Bah Ardent bad u dei uba la ieng iakhun teng ia ka elekshon MDC na ka HSPDP mynba u Bah Ardent u dang bat kum u President ka party.
Ha kane ka rynsan ialap elekshon, u Bah Bajop ula pyntip sha ki paidbah ba hadien ka elekshon MP-Lok Sabha, ka KHADC kan sa ujor daka ejahar pyrshah ia u Bah Ardent Basaiawmoit lem bad ia u trai jaka ha Mawkyrwat halor ka jingbam klop ia ka pisa jong ka council.
Haba kynthoh ia ka Congress, une u MDC ula ong ba ka Congress ka dei kaba iatreilang bad ka NPP hapoh KHADC bad ong “Namar kata wat kren bein ne wat kynthoh kulmar ia ka NPP, ioh hadien ka elekshon phin shah weng noh na ka Executive Committee”.
