Agartala, Iaiong 15 : U Myntri Rangbah ka Tripura Manik Saha ula ong ba ka Sorkar jong u, ka don jingthmu ban khyllie biang ia baroh ki case pyniap briew bala leh da ki Sorkar ka Left Front bad Congress ha ki snem bala leit noh.
Haba iakren bad ki nongthoh khubor, u Saha ula ong ba hadien ba dep ka elekshon Lok Sabha, ka Sorkar Jylla ka don jing thmu ban khyllie biang ia baroh ki case ba iadei bad ka jingpyniap briew na ka bynta ki jingmyntoi ka sain hima sima.
Ula ong ba ha ka jingleit ba dang shen jong u sha South Tripura District, la pyntip sha u ba ha kane ka District, haduh 69 tylli ki case pyniap briew na ki kam sain pyrthei, bala leh da ki runar ha ki 30 snem bala leit noh tad haduh u snem 2018 ba kynthup ia 25 snem (1993-2018) ka jingsynshar jongka Left Front bad san snem (1988-1993) ba synshar da ka Sorkar synrop ka Congress-Tripura Upajati Juba Samiti (TUJS).
“Nga lah ban kynmaw ba ki kti jong ki nongthep vote kiba thep sha ka shap jong ka kti, kila shah mait ha West Bengal. Mynta, ka Congress bad ka CPI-M kila shukor ia ki paidbah ha ka kyrteng ka synshar paidbah” ong u Saha.
